Sustenibilidadi: in sa Miniera de Nuraxi Figus nascit una biofàbbrica de Spirulina

Unu benidori nou po unu unu logu acapiau a su craboni
2 Ladàminis 2021
terra

Terra - Sa Miniera de Nuraxi Figus, in Crabonia, est sèmpiri istètia su logu de su craboni, mentras in su benidori at èssiri unu logu nou: su de un'aligaxedda impreada meda in potecaria.

Fueddaus de s'aligaxedda connota cun su nòmini de “Spirulina”, protagonista de unu progetu chi si lamat “Spirulina Noa”. Unu progetu chi ndi bessit de sa conca de sa "Livegreen" de Aristanis, sa primu azienda sarda a fai Spirulina biològica. Unu progetu chi tenit giai un'impiantu pitiu, e chi intru de ocannu at a incarrerai beni sa circa asuba de sa Spirulina.

terraSa punna de custu progetu - pretzisat s'amministradori e sòtziu de sa "Livegreen" Gabriele Cipri - "no est de otenni unu produtu chi s'aciungit a is 17 produtus chi s'agatant giai in su mercau, ma est de otenni unu protòtipu de biofàbbrica po su benidori". Totu custu est de importu mannu po s'istùdiu pibincosu chi pertocat una produtzioni chi s'at a fai feti asuta de terra, un'istùdiu chi olit cumprèndiri ita acontessit arendi sa spirulina in custu stuvoni, pighendi po finas in cunsidèriu cali funt is profetus de sa produtzioni de custa aligaxedda in nd'una riserva geotermica.

Cun s'obbietivu de promòviri un'istili de vida sanu e naturali, "Livegreen", impari cun aziendas de su territòriu e cun aziendas italianas, in prus de prodùiri e bendi Spirulina fait àterus produtus puru.

Fadendi feti un'esempiu, podeus nai ca sa Spirulina est intrada in sa produtzioni de produtus tìpicus sardus comenti su pani gutiau e sa fregua.

No ispantat, duncas, ca s'iscopu finali de su progetu est su de lòmpiri a fai una bioffàbrica chi siat capassa de avalorai su nudriamentu de òminis e de bèstias. Custu at èssiri possìbbili po finas gràtzias a sa partnership cun sa "Cooperativa Produttori di Arborea".

De ogni manera, po immoi su primu obbietivu de s'azienda de Aristanis est su de cumprèndiri comenti pònniri in òpera unu protzessu de traballu innovativu.

Su progetu at a durai ancora po duus annus. Sa primu punna est sa de lòmpiri a fai un'impiantu pilota chi at èssiri su fundamentu de s'impiantu industriali verdaderu.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags