Sustenibilidadi: in Sardigna sa massaria chi ispaciat pagu àcua
Terra – Si lamat Andrea Liverani, tenit 24 annus e est de Terraba. Cun Liverari sa Sardigna ndi betit a domu s'”Oscar green” natzionali, est a nai su prèmiu de “Coldiretti giovani Impresa” po sa creatividadi. Unu prèmiu chi tenit puru su patrotzìniu de su Ministeru de is Polìticas Agriculas e de is Polìticas po is Giòvanus.
Liverani at bintu in sa categoria “Fare rete” cun nd'unu progetu de retza isperimentali asuba de sa massaria de pretzisioni. Una proposta chi evitat s'isperdìtziu de àcua. A fai sa bàrdia a su satu permitendi de resparmiai àcua at èssiri unu droni, chi at a permìtiri po finas de risparmiai concimi e ladàmini impitendi feti su chi serbit. Sa màchina nd'at betiri unu rispàrmiu de àcua de su 30 po centu.
Andrea Liverani at ativau una “partnership” cun Coldiretti Aristanis e cun sa fundatzioni Medsea, un'acapiòngiu chi tenit sa punna de fai unu progetu de retza isperimentali asuba de sa massaria de pretzisioni. Nd'ant pigai parti 10 aziendas agriculas. S'obietivu est su rispàrmiu de àcua chi at a serbiri a otènniri un'impreu mìnimu de energia e a ndi liai s'impestadura chìmica de is terrinus. Duncas custu progetu at a mellorai su rendimentu po ètaru.
Su progetu previdit unu cumpudu aèreu a sa cida. Su cumpudu nd'at a torrai is datus e custus s'ant a depi istudiai siat po curtivu siat po tipu de terra.
Su de Andrea est un'esèmpiu bellu de massaria sustenìbili. Una massaria chi impreat sa tènnica ma chi non si ndi iscarescit nimancu de sa traditzioni de sa massaria de Sardigna.
Bisongiat a pretzisai ca s'“Oscar green” de Coldiretti s'at fatu iscobèrriri un'àtera borta una massaria giòvana e prena de vida. Dd'at fatu cun nd'una azienda sarda de primori, un'azienda chi s'est fata protagonista distinghendusia intre is mellus realidadis innovativas italianas.
Tocat po finas a sutalineai ca, in is ùrtimas cincu editzionis de s'"Oscar green" natzionali promòviu de Coldiretti, sa Sardigna at pigau parti a is issèberus finalis de su prèmiu cun seti aziendas.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
