Amparu ambientali: online “Posidonia Team”

10 episòdius de una serie web chi fueddat de sa mata
3 Onniasantu 2021
terra

Terra - Est incumentzau su 3 de su mesi de onniasantu passau. Seus fueddendi de "Posidonia Team", una serie web de 10 episòdius. Dògnia episòdiu durat unu minutu pagu prus o mancu e tenit comenti protagonistas una fèmina e duus òminis: Marina, Emanuele e Giacomo. Funt pròpiu is tres protagonistas a presentai is caraterìsticas de sa “Posidonia oceanica” e su s'ecostistema istraordinàriu costoidu de sa mata.

Ma ita est sa “Posidonia oceanica”? Est una mata de mari tìpica de su Mediterràneu, chi apartenit a sa famìlia de is "angiosperma". Sa “Posidonia oceanica” est una mata de importu po s'ecosistema de su mari. A dolu mannu, perou, po mori de s'atzioni umana custa mata megat a iscumpàrriri. Intre is minetzas prus grais ddoi at s'impestadura de s'àcua, ma po finas is fàbbricus e s'afraigu.

posidoniaAmparada de sa lei italiana e europea, sa “Posidonia oceanica” est capassa de mudai s'axedùmini de s'àcua. Non est po nudda ca est cunsiderada unu bioinditatori profetosu po su mari. Difatis su "posidoniete" est s'ecosistema prus importanti de su mari Mediterràneu. Tocat a sutalineai ca un'ètaru de prateria podit acasagiai finas a trexentu-cincuanta ratzas diversas de animalis, donendi amparu a piscis meda, prupus, calamarus, cociobas, cotzas e àterus.

No est po nudda ca su contu de "Posidonia Team" ponit in evidèntzia comenti sa "Posidonia oceanica" e is depòsitus chi lassat in s'arenàrgiu, is "banquettes", siant de fundamentu po amparai a sa biodiversidadi de su mari nostru e po ammenguai s'arriscu de freadura chi ferrit is costeras.

Sa serie web est unu traballu chi est istètiu possibili gratzias a is fainas de su progetu PosBeMed2 (Governance e gestioni de sistemas arenàrgiu-duna cun Posidonia in su Mediterràneu) chi èest ghiau de s'Assessoradu de sa defensa de s'ambienti, Serbìtziu tutela de sa natura e polìticas forestalis. Su progetu est finatziau de su Programma de Cooperatzioni Interreg MED atressu su "Fondo Europeo di Sviluppo Regionale" (FESR).

Is temas de sa serie "Posidonia Team" ant èssiri isvilupaus in nd'unu documentàriu.


Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags