In Sant'Antiogu torrat “Passaggi d'Autore – Intrecci mediterranei”

Lompit a sa de 17 editzionis su festival tzinematogràficu “Passaggi d'Autore – Intrecci mediterranei”. Sa manifestada culturali s'isboddiat in Sant'Antiogu e est aprontada de su “Circolo del Cinema Immagini” cun sa diretzioni artistica de su regista bosniacu Ado Hasanovic.

S'atopu incumentzat cenàbara 3 e at a serrai merculis 8 chi enit. In sa manifestada s'ant a podi castiai prus de 60 cortometràgius lòmpius de 20 Paisus diversus. Is cortometràgius, in lìngua mama cun sutatìtulus in inglesu, tenint comenti focus s'Ispagna. Focus puru de sa produtzioni sarda cun Intrinas, est a nai sa fentana chi “Passaggi d'Autore – Intrecci mediterranei” dedicat a is registas sardus.

Impari a is proietzionis ant a torrai is fainas chi cumpletant su festival: is laboratòrius e is atopus cun unus cantu registas de is film proietaus.