S'Universidadi de is Istùdius de Casteddu si fueddat de "Green Deal"

S'atopu est aprontau de s'ateneu casteddaiu e de Legambiente
21 Onniasantu 2021

Terra - Sa Cop26 de Glasgow, est a nai s'atòbiu aprontau de is Natzionis Unias po chistionai de sa crisi climatica, est finia calincuna diri fait e s'Universidadi de is Istùdius de Casteddu impari a Legambiente iat giai amostau sa sensibilidadi cosa sua po custu tema. Difatis, s'ateneu casteddaiu, difatis, iat aprontau un'atopu de importu mannu asuba de sa crisi climatica, de s'energia e de sa sustenibilidadi. Argumentus, custus duus, chi pertocant a sa crisi climàtica etotu.

Sa diri de s'atopu, fissada po su 15 de onniasantu passau in s'aula magna “Mario Carta” de sa Facultadi de Inzennieria e Architetura, est istètia cambiada po mori de su tempus malu chi at fertu sa tzitadi de Casteddu e is àterus tzentrus de sa Tzitadi Metropolitana. S'atòbiu, duncas, s'at a tenni su 25 de su mesi de onniasantu chi at a benni e su logu de s'initziativa at èssiri su mantessi fissau po su 15.

terraPo custa diri de istùdiu, tra is àterus ant a chistionai: Fabrizio Pilo, ProRetori de s'Universidadi casteddaia, Annalisa Columbu, Diretora de Legambiente in Sardigna, e Giorgio Querzoli, Diretori de su Dicaar, est a nai su Dipartimentu de Inzennieria e Architetura de s'ateneu de Casteddu.

In is traballus de su mengianu, a pustis de un'isterrina a incuru de Lagambiente, s'at a chistionai de is obietivus chi s'agatant in su “Green Deal”, s'acòdriu birdi europeu, unu patu chi at a permìtiri de otèniri resursas meda po istudius e circas chi ant a permìtiri de lòmpiri a is obietivus sustenìbilis de su 2050.

Is traballus de su merì ant a pertocai a is energias renoàbilis. Ant a resonai sugetus privaus, pubbricus, sotzialis. Sa punna est cumprèndiri s'istadu de is cosas in Sardigna e in Italia puru. S'at a chistionai de fotuvoltaicu, de trasportus sustenìbilis e po finas de energia eòlica. Medas is personis famadas chi ant a fueddai. Intre custas, Antonello Sanna de s'Universidadi casteddaia, Edoardo Zanchini de Legambiente Italia e àterus meda.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags