Gioddu cun pompia: su produtu licantzu de s'I.I.S. Michelangelo Pira de Thiniscole

Dae sos istudiantes de s'iscola agrària de sa Baronia naschet un'alimentu primorosu fatu cun duos produtos de sa traditzione
25 Gennàrgiu 2022
in sa mesa

In sa Mesa - Est de carchi die una nova interessante chi lompet dae sa bidda de Thiniscole. Una nova de importu chi atenet a su cumpartu de s'agroalimentare. Difatis, dae su traballu de sos istudiantes de s' "I.I.S. Michelangelo Pira" de Thiniscole est nàschidu un'alimentu primorosu: est su gioddu cun sa pompia, una licanzia chi, comente si podet cumprèndere dae su nùmene suo, si faghet aunende duos produtos alimentares de sa traditzione de Sardigna.  

Si pro su gioddu non amus nudda de annànghere, est importante regordare ca sa pompia est s'agrume tìpicu de Thiniscole, sa bidda in provìntzia de Nùgoro chi est divènnida famada pro ite cust'agrume est unu tra sos noe presìdios chi sa "Fondazione Slow Food per la Biodiversità Onlus" at realizadu in Sardigna.

Duncas, podimus sutalineare ca su gioddu cun sa pompia, chi sos pitzocos de "I.I.S. Michelangelo Pira" ant produidu impreande tècnicas modernas, rapresentat un'iscummissa interessante meda, un'iscummissa chi at a fàghere faeddare de sei e peri de s'iscola de sa Baronia chi l'at ghetada pro prima.

in sa mesaMa comente est lòmpidu custu resurtu? Pro s'acumprida de su gioddu cun sa pompia sos istudiantes sunt istados suportados dae Bastianino Piredda, un'espertu in matèria.

Ma no est finia inoghe, pro ite tocat a pretzisare ca su gioddu produidu in s'istrutura iscolàstica de "San Narciso" si faghet impitende una màchina chi permitit de produire gioddu sena emìtere Co2, est a nàrrere una sustàntzia chi est dannosa pro su clima e s'ambiente. Totu su tziclu de traballadura, difatis, at bisòngiu feti de sa currente elètrica e no impreat combustione de gas.

Cun s'agiudu e sa passione de Bastianino Piredda s'iscola de Thiniscole est arreneschida a aunire su late thiniscolesu de sos frades Carta cun sa pompia coltivada dae sos istudiantes de s'istitutu.

 

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg