A s'"Accademia Olearia" duas medàllias de oro "Extragold"

Su "Biol International Prize" e s'azienda aligheresa chi faeddat de sos produtos primorosos de Sardigna
6 Gennàrgiu 2022
in sa mesa

In Sa Mesa - S'"Accademia Olearia" de S'Alighera binchet duas medàllias de oro "Extragold" in su cuncursu pulliesu "Biol International Prize".

Ma ite est su prèmiu "Biol International Price"? Su prèmiu "Biol International Price" est su prèmiu pro su mègius ògiu ermanu biològicu de su mundu. Nàschidu in su 1996, custu prèmiu est rapresentativu de sa manifestatzione internatzionale prus importante in su setore de s'ògiu ermanu, siat pro su nùmeru de realidades produtivas chi nde leant parte siat pro su nùmeru de sos Paisos, de sos espertos e de sos consumadores interessados.

in sa mesaCun sas medàllias de oro "Extragold" s'"Accademia Olearia" at duncas otentu su reconnoschimentu prus importante chi podiat otènnere. Sos ògios chi ant bìnchidu sunt s'ògiu "Bio Dop Sardegna Fruttato Verde" e s'ògiu "Biologico Accademia Olearia Riserva", duos produtos de primore de sa produtzione biològica de Sardigna.

Una satisfatzione manna pro sa produtzione biològica de s'azienda agrìcula Fois, ghiada finas a pagu tempus dae Giuseppe Fois, e in die de oe gestida dae sos fìgios Alessandro e Antonello.

Faeddende de sas medàllias otentas, sos duos frades Fois ant sutalineadu ca "retzire custos duos reconnoschimentos ulteriores est motivu de altivesa manna pro totu s'iscuadra de 'Accademia Olearia"'. E e ant sighidu: "Semus cuntentos meda ca s'impignu nostru pro sa calidade in sa coltivatzione biològica siat apretziadu a custos livellos".

Alessandro e Antonello, difatis, creent a beru in su biològicu comente mètodu de produtzione. Una produtzione, sa chi at su marcu "Accademia Olearia", chi est un'ispricu de sos printzìpios de s'azienda de sos Fois. Printzìpios chi ant comente filosofia su rispetu pro sa natura, est a nàrrere ca sos produtos issoro sunt lìberos dae s'isfrutamentu intensivu. Su traballu de sos Fois, difatis, s'isbòligat respetende sos fundos de olia e avalorende gosi totu sa produtzione biològica.

S'atentzione pro s'ambiente de sos fìgios de Giuseppe la bidimus finas in àteras atziones. Tra custas s'installatzione de un'impiantu de energia rinnovàbile chi alimentat s'istabilimentu produtivu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg