A sas birras de Sardigna bator reconnoschimentos importantes dae su "Brussels Beer Challenge 2021"

In sa Mesa - Est acabada in sa fine de su mese de onniasantu 2021 e rapresentat una tra sas manifestadas prus importantes chi pertocant a sa produtzione brassìcola in su continente europeu. Semus faeddende de su "Brussels Beer Challenge", est a nàrrere unu tra sos concursos prus rilevantes in su campu de sa produtzione de sas birras màstrinas. Unu cuncursu chi si faghet onni annu in Belgiu, sa regione europea prus famada pro sa produtzione de birra.

Pro sa Sardigna e pro sas realidades brassìcolas suas s'editzione 2021 est istada una manifestada primorosa meda. Difatis, a s'ìsula sunt andadas bator medàllias. Duas medàllias l'ant bìnchidas su "Birrificio 4 Mori di Montevecchio"; una l'at bìnchida su birrifìtziu "Brew Bay" de Quartu Sant'Aleni e un'àtera medàllia l'at otenta su birrifìtziu "Nanumoru" de Seddori.

Su "Birrificio 4 Mori di Montevecchio" est un'azienda chi at sa sede sua in sas minieras de Monti Bèciu, in intro de su Parcu Geominerariu de sa Sardigna. S'azienda rapresentat una realidade produtiva de primore ecu-sustenìbile e abbàidat a su benidore cun unu progetu capassu de respetare e avalorare su territòriu suo. Sas duas etichetas chi ant otentu sos reconnoschimentos in su cuncursu de Bruxelles sunt sa "Pozzo 9" e sa "Pozzo 16". Sa primu birra at bìnchidu sa medàllia de oru; est una bèvida "Vienne Lager" a colore ruju e at un'ispuma bianca, omogènea e durajola. Sa "Pozzo 16", imbetzes, at otentu sa medàllia de brunzu, est una Lager Helles brunda e est produida sighende su "Reinheitsgebot", est a nàrrere s'editu de sa puresa bavaresu. Est importante pretzisare ca cust'eticheta est istada premiada peri in s'editzione 2021 de su cuncursu CICA, un'àteru cuncursu internatzionale de importu mannu dedicadu a sas birras màstrinas.

S'àtera eticheta premiada cun sa medàllia de brunzu in su "Brussels Beer Challenge" 2021 est sa Sant'Helles, bèvida produida dae su birrifìtziu Brew Bay, realidade chi at un'istòria de passione e de amore pro sos produtos artesanos. Una medàllia de brunzu est andada finas una sa birra Ossidya de Nanumoru, azienda seddoresa nàschida cun sa punna de produire feti birras interessantes e capassas de acuntentare onni paladu, finas su de sos clientes ischitetos. Ossidya est una birra niedda e at un'ispuma chi paret una crema a colore de su caputzinu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22