Su "Gambero Rosso" promovit su risu sardu Carnaroli

Su produtu Passiu intrat in sa "Top Italian Food 2022"
27 Gennàrgiu 2022
in sa mesa

In Sa Mesa - Su "Gambero Rosso" promovet su risu sardu Carnaroli. Gosi, su risu de s'azienda aristanesa Passiu intrat in sa "Top Italian Food 2022" e su risu de Sardigna si nde leat una bìnchida importante. Pagu famadu foras de sas làcanas isulanas, cun su reconnoschimentu de su "Gambero Rosso" àrtziat a pitzu de unu pòdiu famadu.

Grandu produtora de risu, sa Sardigna est in sa de chimbe positziones in sa classìfica de sas regiones chi coltivant custu cereale. Sunt sos terrinos abrainosos de su Campidanu e de totu s'àrea de sa provìntzia de Aristanis chi lu produint. Faeddamus de terras in ue si faghet unu cereale primorosu, est a nàrrere unu risu de calidade arta.

Est pròpiu Aristanis sa tzitade chi faghet de mama a su risu Passiu. S'azienda nàschida in su 1975 est arrenneschida a ligare su nùmene suo cun s'idea de unu produtu de calidade primorosa. Tocat a pretzisare ca su produtu prus famadu de s'azienda est sena de duda su "Riso Gioiello di Sardegna", unu risu istimadu meda de sos "chef" chi lu issèberant pro su colore e pro su sabore suo.

in sa mesaDe ogni manera, in die de oe su nùmene de Passiu bolat in sos tìtulos de sos giornales pro su risu Carnaroli clàssicu, chi est intradu a fàghere parte de sa ghia de su Gambero Rosso "Top Italian Food 2022". Tocat finas a pretzisare ca Passiu est s'ùnica realidade sarda iscrita in s'"Albo dei produttori di Carnaroli Classico" de s'"Ente nazionale risi".

Tra sas 30 aziendas italianas produtoras de risu, Passiu rapresentat s'ùnica azienda de Sardigna chi s'agatat in custa ghia e chi, duncas, podet impitare e insertare su marcu "Top Italian Food 2022" in sas cunfetziones suas.

Est nòdidu ca su Carnaroli Classicu est cunsideradu dae sos chef su rei de su risu, duncas pro sos de Passiu su reconnoschimentu de su Gambero Rosso est una conchista de importu mannu, chi paris cun su risu "Vialone Nano Classico" e su risu nieddu "Gioiello" est tra sas prendas de s'azienda.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg