Su marcu DOP e sa Sardigna

Sos produtos cun "Denominazione di Origine Protetta" si reconnoschent dae su marcu grogu e ruju
14 Gennàrgiu 2022
in sa mesa

In sa Mesa - Ite cheret nàrrere DOP? DOP est s'acrònimu de "Denominazione di Origine Protetta". Sa sigla DOP si reconnoschet dae su marcu a colore grogu e ruju. Famadu meda, custu marcu indicat sos produtos tìpicos.

Su marcu "Denominazione di Origine Protetta" est reconnòschidu e cumpartzidu a manera ufitziale dae s'Unione Europea.

Sa Sardigna at in totu sete produtos registrados cun marcu DOP. Sa sigla annòditat siat sos alimentos siat sos binos. Ambos devent àere caraterìsticas ligadas a un'ambiente geogràficu pretzisu e a sas traditziones suas. Pro custas resones su marcu pertocat feti a sas ispetzifitzidades alimentares produias e traballadas in àreas pretzisas. A manera crara, sos produtos chi ant su marcu DOP devent respetare unu disciplinare de produtzione chi descriet s'istòria, su territòriu e sa traballadura de su produtu.

dopSos produtos a marcu DOP, difatis, sunt caraterizados dae unas cantas cunditziones: sa produtzione de sas matèrias primàrgias e sa trasformatzione issoro devent èssere collocados in intro de su cuntestu de sa regione chi lis at donadu su nùmene; sa calidade e sas caraterìsticas de su produtu otentu devent èssere atribuidos a s'ambiente geogràficu dae ue lompent, est a nàrrere dae sos fatores naturales e umanos comente su clima, dae sa calidade de sa terra e dae sas connoschèntzias tècnicas de su logu.

Su marcu DOP est regulamentadu dae sa normativa europea, prus a notu dae su regulamentu chi at istituidu su sistema de protetzione de sas denominatziones territoriales "CEE 510/2006 -Protezione delle Indicazioni Geografiche e delle Denominazioni d'Origine dei prodotti agricoli e alimentari".

Su marcu DOP, duncas, est una garantzia pro chie còmporat. Custu pro ite su marcu de "Denominazione di Origine Protetta" est un'istrumentu de diferentziatzione in matèria de calidade.

Tocat finas a nàrrere ca bi sunt cunsòrtzios de tutela e valorizatzione chi traballant pro fàghere otènnere custu reconnoschimentu. Sos DOP de Sardigna rapresentant produtos de primore in sa produtzione agroalimentare europea. Sos produtos sardos chi ant custu marcu, difatis, sunt fìgios de una cumbinatzione ùnica tra sos fatores umanos e ambientales e sos territòrios de s'ìsula.

Tra sos marcos DOP agatamus: unos cantos binos; su "Fiore Sardo"; su "Pecorino Romano"; su "Pecorino Sardo"; su "Olio extravergine d'oliva"; su "Carciofo spinoso di Sardegna"; su "Zafferano di Sardegna".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg