Su progetu “CITRUS” pro sa valorizatzione de sos agrumes e su bandu “Scouting” pro sas aziendas sardas

S'Agenzia “Laore Sardegna” aprontat un'adòbiu pro presentare su bandu “Scouting”
20 Gennàrgiu 2022
in sa mesa

In sa Mesa - Laore, s'Agenzia de sa Regione Autònoma de Sardigna chi suportat sas realidades produtivas chi in Sardigna faghent massaria o chi faghent atividades chi pertocant a su campu de sa pisca, at aprontadu un'adòbiu online chi at a èssere un'ocasione ùtile pro aprofundire unos cantos aspetos chi atenent a “Scouting”, su bandu nàschidu dae su progetu “CITRUS”. S'adòbiu at a èssere a sas 11.00 de chenàbura 28 de gennàrghiu 2022.

Ma ite est “CITRUS”? Est unu progetu importante e de interessu internatzionale finantziadu dae su “Programma Interreg Italia-Francia Marittimo 2014-2020”. Custu progetu est ghiadu dae su “Centro Sperimentazione e Assistenza Agricola” de sa Regione Liguria. A su programma leant parte s'Agenzia “Laore Sardegna” pro sa Regione Autònoma de Sardigna; su “Consorzio Polo Tecnologico Magona” po sa Regione Toscana; sa “Chambre du Commerce de Corse” pro sa Corsica e sa “Innolabs s,r.l”. Paris cun “CITRUS”, “Scouting” est nàschidu cun sa punna de afortiare sas aziendas chi produint o traballant sos agrumes. S'idea est sa de fàghere crèschere sas cumpetèntzias e sas connoschèntzias chi atenent a sa produtzione e massimamente a sa valorizatzione de custos produtos. Duncas, faeddamus de un'oportunidade importante pro sas aziendas sardas chi cherent leare parte a custu progetu.

in sa mesaSu bandu “Scouting”, difatis, est istadu fatu pro permìtere a binti “MPMI” de Sardigna de fàghere una caminera de formatzione in su campu de sos agrumes: pro sa produtzione de custos produtos; pro sa traballadura issoro; pro su cummètziu e peri pro sa valorizatzione de custos produtos agrìculos.

Su programma de su “webinar” de su 28 de gennàrghiu 2022 previdit sa presentatzione de su progetu “CITRUS” e sa presentatzione de su bandu “Scouting”. Custa, però, at a èssere una ocasione importante pro faeddare de sa valorizatzione de sos agrumes e peri pro aprofundire su tema de sa traballadura de sos refudos de sa produtzione.


Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg