Unu produtu cun marcu DOP: su "Pecorino Romano"

Un'istòria antiga pro unu casu chi si faghet feti in Sardigna, in sa regione Làtziu e in sa provìntzia de Grosseto
17 Gennàrgiu 2022
in sa mesa

In sa Mesa - Su "Pecorino Romano" est unu produtu cun marcu DOP famadu meda. Est unu casu antigu chi in die de oe si faghet feti in Sardigna, in sa regione Latziu e in Toscana, in sa provìntzia de Grosseto, est a nàrrere in territòrios chi ant sas cunditziones giustas pro sa produtzione sua. Pro fàghere su Pecorinu Romanu sas cunditziones netzessàrias sunt: sas ratzas berbeghinas autòctonas e sas pasturas ìnnidas, comente sas de sa Sardigna, cun molas e erbas aromàticas chi dant a su casu unu gustu carcu tìpicu.

S'istòria si contat ca su Pecorinu Romanu est istadu unu casu licantzu meda pro sos Romanos. Difatis, giai su poete romanu Virgilio lu numenta in su 48 a.C. Lu faghet feddande de sas propiedades nutritivas suas. Ma no est totu. Nos contat peri ca a sos sordados romanos fiat impostu unu consumu fitianu de 27 grammos de custu casu.

Su "Pecorino Romano" est unu casu sìncheru e de sustàntzia, ricu de proteinas e chi si digirit a discansu. At unu cortzu fine, si podet mandigare e finas tratagasare. Custu casu depet istasionare a su mancu pro chimbe meses pro lu podet mandigare, mentras pro lu tratagasare at bisòngiu de 8 meses de istajonadura.

Su "Pecorino Romano" at sempre forma de tzilindru. Onni forma de casu at unu pesu incluidu tra sos 20 kg e sos 35 kg.

Su "Pecorino Romano" est unu casu chi depet sighire protzeduras pretzisas. Custas protzeduras sunt indicadas e benint fatas respetare dae su Cunsòrtziu, “Consorzio per la Tutela del Formaggio Pecorino Romano”, nàschidu gràtzias a unu grupu de operadores sardos e de sa regione Làtziu in s'annu 1979.

In su 1981, su Cunsòrtziu at otentu s'afidamentu de s'incàrrigu de vigilàntzia subra sa produtzione e subra cummèrtziu de su "Pecorino Romano" dae su Ministèriu de s'"Agricoltura". A pustis, in su 2002, su Cunsòrtziu at apidu un'incàrrigu nou pro sa tutela de su marcu DOP dae su Ministèriu de sas "Politiche Agricole e Forestali".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg