"Festa degli Agrumi": sa resèssida de sa die de sos agrumes de "Campagna Amica"

S'1,7% de sa produtzione natzionale est sardu
4 Fiàrgiu 2022
in sa mesa

In sa Mesa - S'est isboligada sàbadu 29 de su mese de ghennàrgiu coladu sa "Festa degli Agrumi" ordingiada de "Campagna Amica", su progetu de "Coldiretti" chi at sa punna de amparare e valorizare sa masserìtzia.

Cun s'1,7% de sa produtzione natzionale, sa Sardigna at afestadu sa die de sos agrumes e de sas propiedades benèficas issoro.


Cun sas espositziones de sas biodiversidades, sa "Festa degli Agrumi" at àpidu una resèssida manna.

Ma canto sunt sos agrumes produidos dae sa Sardigna? S'ìsula produit prus de 680 milla cuintales de agrumes. Tocat a pretzisare ca sa superfìtzie isulana impreada pro coltivare sos agrumes est de bator milla ètaros pagu prus o mancu. Custos sunt traballados de chimbe milla aziendas cun una mèdia de 0,80 ètaros pagu prus o mancu. Una produtzione importante, duncas, chi est prus importante si pensamus ca in Sardigna s'agatat un'agrume raru meda, est a nàrrere sa Pompìa.

Custu est un'agrume chi s'agatat in intro de s'"Atlante della biodiversità". Sa Pòmpìa est valorizada, finas a manera innovativa, de unas cantas aziendas de "Campagna Amica".

In sa "Festa degli Agrumi" s'est sutalineada peri s'importàntzia chi sos agrumes ant pro sa salude.
A nde faeddare sunt istados pròpiu sos nutrizionistas.

Sa "Festa degli Agrumi" at àpidu comente protagonistas unas cantas tzitades importantes de Sardigna: Tàtari, Aristanis, Cuartu Sant'Aleni, Ceraxius e Nùgoro. Cada una cun s'initziativa sua.

In Tàtari sa "Festa degli Agrumi" s'est isboligada cun unu testimonial importante meda: s'iscuadra de sa Torres feminile, chi at afortiadu su messàgiu chi aunit sa cultura pràtica isportiva cun un'alimentatzione sana. In Aristanis, in prus de sos agrumes sa festa at àpidu comente protagonista una nutritzionista. In Cuartu Sant'Aleni e Ceraxius ant fatu su dovere de domo sos colores de sos agrumes in espositzione. In fines, sa "Festa degli Agrumi" de Nùgoro, paris cun totus sas ratzas de agrumes, at àpidu sa Pompìa comente reina de sa festa.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg