Marcu de Tutela pro "Sa Tunda" e sos "Culurgioneddos frissos de recotu"

Sos produtos de primore de Pula ant sa "Denominazione comunale di origine" De.C.O
14 Fiàrgiu 2022
in sa mesa

In sa Mesa - Fiat su 2020 cando sos primos duos produtos fatos in Pula oteniant su marcu De.C.O, est a nàrrere su reconnoschimentu de "Denominazione comunale di origine". Gosi, "Sa Tunda" de Pula e sos "Culurgioneddos frissos de recotu" ant cumintzadu s'àndala de su marcu de tutela de sos produtos de sa bidda.

Ma faghimus unu passu in dae segus e arribbamus a cando sa comuna ghiada dae Carla Medau at aprovadu su regulamentu pro atribbuire a sos produtos de su territòriu suo su marcu De.C.O. Unu marcu de tutela chi podet èssere otentu dae sos produtos tìpicos de s'agrualimentare e de s'enogastronomia, ma finas dae sos produtos de sa cultura, de sas traditziones e de s'artesanadu. Totu custu pro ite sa "Denominazione comunale di origine"  atestat s'orìgine e su ligàmine cun su territòriu in ue naschent sos produtos tìpicos.

S'initziativa leada dae sa Comuna de Pula at àpidu su sustegnu de Coldiretti, chi acrarat ca - "su marcu De.C.O. est un'oportunidade pro afortigare sa filiera agrualimentare" de su logu. Difatis, "in su disciplinare - sutalìneat Coldiretti - est indicadu s'impreu de su trigu e de su recotu sardu".

in sa mesaEst impoertante sutalineare ca Pula in prus de su mare e de archeologia iscummitit subra su turismu. Tocat a pretzisare, però, ca cussu de Pula est unu turismu chi promovit sas licànzias de su territòriu.

Comente sutalineau giai, "Sa Tunda" e sos "Culurgioneddos frissos de recotu" sunt sos primos duos produtos a àere su marcu De.C.O. De ogni manera - comente pretzisat sa Sìndiga Medau - custu "est feti su primu passu", unu passu chi aberit sa ghenna a àteros produtos chi sunt "produtos de primore de su territòriu nostru, comente sa tomatedda e sa figu".

S'augùriu de sa Sìndiga, duncas, est chi custos produtos a "Denominazione comunale di origine" potzant intrare a manera progressiva in sos menu de sos ristorantes, de sas posadas e de sos agriturismos.

In su marcu De.C.O. de sos produtos pulesos est rapresentada un'iscartedda cun riferimentos a sos mosàicos de sa zona archeològica de Nora.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg