In Pula figu e tomata ant su marcu De.C.O.

Una pabiru de identidade chi atestat orìgine e ligàmene cun su territòriu pulesu
23 Fiàrgiu 2022
in sa mesa

In sa Mesa - In Pula figu e tomata ant su marcu De.C.O, acrònimu de "Denominazione comunale di origine". Su marcu de tutela comunale at sa finalidade de valorizare sos produtos locales.

De ogni manera, Pula no est noàdile in matèria De.C.O. Difatis, sa tzitade in provìntzia de Casteddu aiat giai duos produtos a denominatzione De.C.O, est a nàrrere: sa Tunda de Pula, unu pane impastadu a sìmula, e sos Culurgioneddos frissos de recotu. Sos produtos pulesos ant otentu sa "Denominazione comunale di origine" in su 2020.
 

In su progetu de sa Comuna, paris cun Sa Tunda de Pula e sos Culurgioneddos frissos de recotu, sa figu e sa tomata ant a contribuire a promotzionare su territòriu.

Pro otènnere su marcu De.C.O sos produtos devent respetare unu disciplinare in ue sunt dislindados: su ligàmene cun su territòriu, sa modalidade de coltivatzione, sas caraterìsticas de sos produtos, s'imboddiada, s'etichetadura, su cummèrtziu e sos paràmetros de calidade.

In Pula custu marcu de tutela est nàschidu cun s'agiudu de Coldiretti e bisòngiat peri a sutalineare ca su De.C.O. est istadu pensadu siat pro sos produtos agrualimentares siat pro s'enogastronomia e finas pro s'artesanadu, duncas siat pro sa cultura ca pro sas traditziones.

in sa mesaPula est una tzitade chi cheret intzentivare semper de prus su turismu chi at a fundamentu s'esperièntzia. Pro custa resone, comente narat sa Sìndaga Carla Medau, s'idea est sa de promòvere sas licanzias de sa bidda, sos sabores suos e sas retzetas de su tempus coladu cun "sa punna de fàghere intrare custos e àteros produtos [...] in sos menu de sos ristorantes, de sas posadas o de sos agriturismos".

Sa tomata de Pula e sa figu de Pula sunt produtos de primore, ma non sunt sos ùnicos produtos de su territòriu a èssere estremados. Sa bidda, difatis, at medas produtos de valorizare cun unu marcu “Pula” (marcu De.C.O.). Est pro custu - sutalìneat sa consigiera Simonetta Lucarelli, delegada a s'Agricultura - ca "Sos artesanos, sos operadores econòmicos, sos tzitadinos e sos assòtzios ant a pòdere èssere protagonistas de una caminera de registratzione de produtziones locales chi at fines promotzionales, de valorizatzione e de tutela”.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg