S'iscartzofa DOP de Sardigna si movet in sos mercados europeos

In su mese de abrile 2022 s'iscartzofa sarda at a èssere in sa Fiera de Berlinu
28 Fiàrgiu 2022
in sa mesa

In sa Mesa - S'iscartzofa DOP de Sardigna si movet e lompet a conchistare sos mercados europeos. Tocat a sutalineare ca pro fàghere connòschere custa licànzia est istada aberta finas sa bèndida on-line. No est totu, pro ite in su mese de abrile, custa ortalìtzia de primore at a bolare finas a sa "Fruit Logistica Berlín", sa primu fiera mundiale de su cummèrtziu de frùtora e ortalìtzia. Una manifestada chi incluit peri sa frùtora sica comente sa nutzola, e produtos biològicos, frores e matas pro "selfservice".

Sa "Fruit Logistica Berlín" s'at a isboligare dae su 5 a su 7 de su mese de abrile 2022. Sa butega "Imprentas - La Sardegna a casa" paris cun su "Consorzio di Tutela del Carciofo Spinoso di Sardegna" at detzisu comente promòvere s'iscartzofa sarda. Ambos ant sigladu un'acòrdiu pro sa valorizatzione e su cummèrtziu de s'iscartzofa DOP foras de sas làcanas de s'ìsula. Sa bèndida est acumandada a sa prataforma ispetzializada in produtos de primore sardos "Imprentas - La Sardegna a casa".

Ma non est acabada. Carlo Cherchi, diretore de su "Consorzio di Tutela del Carciofo Spinoso di Sardegna", difatis, faghet ischire ca gràtzias a unu progetu finantziadu dae sa Regione Autònoma de Sardigna, s'iscartzofa DOP sarda at a àere unu ispàtziu espositivu in sa "Fruit Logistica Berlín".

In sa Fiera de Berlinu s'iscartzofa sarda at a èssere acumpangiada dae addòbios e tastos. Sunt unas cantas, difatis, sas retzetas chi ant comente protagonista s'iscartzofa DOP de Sardigna, est a nàrrere unu "super food" ricu de vitaminas e sales minerales, unu produtu licanzu, chi at pagu calorias e chi, duncas, non faghet ingrassare.

Faeddande de s'iscartzofa DOP sarda e de sa detzisione de valorizare su produtu, Andrea Fenu, su "marketing specialist" de s'azienda Imprentas.eu, sutalìneat ca custa ortalìtzia "est rechèdida in Itàlia e in logos istràngios [...] in ue - sighet - sos 'gourmet' amant sas produtziones a marcu Ue". De ogni manera, custu produtu DOP  - acrarat Fenu "est rechèdidu finas in Sardigna, massimamente in sas zonas in ue non est coltivadu e duncas non est fàtzile a lu agatare".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg