S'ògiu sardu tra sas 100 realidades produtivas italianas sinnaladas dae Forbes

S'"Accademia Olearia" faget bolare s'ògiu fatu in Sardigna
21 Fiàrgiu 2022
in sa mesa

In sa Mesa - Tra sas 100 aziendas de primore pro s'agroalimentare sinnaladas dae sa rivista "Forbes", su "magazine" americanu de economia, agatamus s'ògiu sardu produidu dae s'"Accademia Olearia" de s'Alighera.

Gràtzias a "Forbes 2022" s'azienda aligheresa de sa famìlia Fois sighit un'àndala de cunfirmas chi lompent dae su mundu de su "food". Difatis, cun su reconnoschimentu otentu dae "Forbes", sa realidade produtiva de sa Nurra est divènnida azienda "leader" pro sa produtzione de ògiu siat a livellu italianu siat a livellu internatzionale.

Pro s'azienda de sos Fois su nùmene de s'ògiu "Accademia Olearia" in sa classìfica de "Forbes" sighit sa resèssida otenta a pustis de àere bìnchidu sa "Doppia Medaglia d'Oro" in su cuncursu "Biol Novello 2021". Semus faeddende de unu cuncursu internatzionale chi s'est isboligadu in Basilicata, a manera pretzisa in sa tzitade de Matera. Non est totu, pro ite tra sos ògios de Sardigna, su de "Accademia Olearia" est lòmpidu finas a su primu postu de sa classìfica mundiale "EVOO World Ranking" e est unu produtu presente in sa ghia de su "Gambero Rosso" "Top Italian Food".

De ogni manera, su de "Forbes" est unu reconnoschimentu privilegiadu, chi premiat sas aziendas chi ant valorizadu sos produtos de su territòriu issoro moende dae un'atuamentu curadu cun s'esperièntzia e capatzidade manna. Faeddamus de un'azienda chi rapresentat bene sa manera italiana de fàghere impresa. Sa manera de fàghere impresa agrìcula de sos Fois est sutalineada dae "Forbes", chi ammentat ca "Accademia Olearia" dae bator generatziones e prus coltivat e traballat olia, olia chi benit trasformada in ògiu.

Pro su "magazine" sos produtos chi faghent sa fortza de s'azienda aligheresa sunt su "Fruttato verde" e su "Gran Riserva Giuseppe Fois". Su "Gran Riserva Giuseppe Fois" rapresentat un'espressione de calidade arta meda. Comente pretzisat su "magazine", sa de "Accademia Olearia" est una calidade chi caminat paris cun su rispetu pro s'ambiente. S'azienda, difatis, at un'impiantu de energias rinnovàbiles e unu sistema chi torrat a impreare sos refudos de s'olia traballada.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg