Sos binos sardos e su “Grenaches du Monde”

Torrat su cuncursu chi faghet bolare sos binos de Sardigna
10 Fiàrgiu 2022
in sa mesa

In sa Mesa - Torrat "Grenache du Monde". Su ligàmine tra sos binos sardos e su cuncursu internatzionale dedicadu a sos binos de calidade est cosa nòdida. Lu narat sa classìfica de sos binos chi onni annu faghet faeddare de sa Sardigna cun medàllias de oro e medàllias de prata. Pro cumprèndere sa resèssida de s'ìsula est bastante pensare ca s'annu coladu sos produtores sardos ant batidu a domo 27 medàllias de oro e 14 medàllias de prata.

Torradu in su 2022, su cuncursu enològicu internatzionale at abertu sas iscritziones pro sa gara.

grenache"Grenache du Monde", lu ammentamus, est unu cuncursu dedicadu a sos binos otentos cun vàrias ratzas de àghina chi apartenent a sa famìlia de sos "grenaches". Ultres a su Cannonau de Sardigna, tra sas ratzas de àghina chi dant vida a sos binos "Grenache" agatamus binos biancos e nieddos fatos dae sas bides de "Garnatxa", "Garnacha", "Tai" ruju, "Gamay del Trasimeno", "Granaccia", "Bordò", "Alicante" e "Iladoner pelut".

Su prèmiu "Grenaches du Monde" s'at a isboligare dae su 4 a su 6 de su mese de maju in sa tzitade ispagnola de Olite (Olite apartenet a comunidade autònoma de sa Navarra). Su cuncursu est organizadu dae su "Conseil interprofessionnel des Vins du Roussillon (CiVR)" e at comente partner s'"Agenzia Laore Sardegna".

Podent leare parte a su "Grenaches du Monde" de su 2022 sos binos nieddos, sos rosados e sos biancos chi ant sas denominatziones IGT ("Indicazione Geografica Tipica), DOC ("Denominazione di Origine Controllata") e DOCG ("Denominazione di Origine Controllata e Garantita").

Su "Grenache du Monde" previdit duas setziones: binos fatos cun prus de s'85% de "Grenache" e binos fatos cun prus de su 51% de "Grenache".

Pro leare parte a su cuncursu est netzessàriu fàghere s'iscritzione intro su 6 de su mese de abrile 2022 impreende su mòdulu publicadu in su situ ufitziale de sa manifestatzione.

Sos campiones de binu de Sardigna depent èssere cunsignados a s'"Agenzia Laore Sardegna - Sportello Unico Territoriale per l'area del Sinis", carrera Santa Maria n. 6, localidade Pardu Nou , Siamajori. Sos campiones podent èssere cunsignados intro su 6 de su mese de abrile 2022 ma feti su lunis e su giòbia de sas 9.30 a sas 12.30.

A.C.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg