Duas cantinas de Mamujada premiadas dae "Guida Bio" 2022

Sos binos de "Cantina Canneddu" e de "Giuseppe Sedilesu" binchent peri pro sos issèberos “green” e ecosustenìbilis
3 Martzu 2022
IN SA MESA

In sa Mesa - Sunt duas sas cantinas sardas chi sunt istadas premiadas dae sa "Guida Bio" 2022, est a nàrrere dae s'ùnica ghia italiana dedicada a manera esclusiva a produtos biològicos comente binu e ògiu (tzertificados e/o in cunversione). "Guida Bio", difatis, est nàschida cun sa finalidade de valorizare sas produtziones chi respetant s'ambiente e sa salude de s'òmine.

Ma cali sunt sas realidades produtivas de Sardigna chi ant otentu su reconnoschimentu de custa ghia famada? Sa "Cantina Canneddu" e sa "Giuseppe Sedilesu", chi ant otentu su reconnoschimentu siat pro sos binos biològicos tzertificados siat pro sos issèberos "green" e ecosustenìbilis issoro.

in sa mesa"Guida Bio" est nàschida cun sa punna de nos contare sos produtos e sas esperièntzias de sos chi ant detzididu de sighire s'àndala de sas produtziones biològicas. Tra sas aziendas contadas das sa ghia in su 2022 agatamus finas custas duas realidades produtivas sardas de primore.

Sos binos sinnalados in sa ghia sunt istados tastados e ant otentu unu puntègiu dae 2 a 5 fògias. No est totu. Sa ghia dat finas unu mentovu ispetziale, est a nàrrere sa fògia de oro, a sos binos chi si sunt fatos reconnòschere pro elegàntzia, calidade e dislindadas.

Ma ite nàrrere de sos binos sardos premiados? Sa cantina "Giuseppe Sedilesu" binchet cun sos binos: "Ballu Tundu", unu "Cannonau di Sardegna DOC Riserva" de su 2015; "Erèssia", unu "Cannonau di Sardegna DOC" de su 2019; "Mamuthone", unu "Cannonau di Sardegna DOC" de su 2019; "Perda Pintà", unu "Barbagia IGT" de su 2019.

Sa "Cantina Canneddu" batit a domo su reconnoschimentu importante cun sos binos: "Zibbo Rosè", unu "Cannonau di Sardegna DOC" de su 2020; "Zibbo Rosso", unu "Cannonau di Sardegna DOC" de su 2019; "Zimò Rosso", unu "Cannonau di Sardegna DOC" de su 2019; "Delissia", unu binu biancu "Barbagia IGT de su 2019.

"Guida Bio" si podet lèghere intrende in su situ suo. Intrados in sa pàgina tocat a andare in sas setziones de  "Guida Bio 2022", "Guida Bio 2021" e "Guida Bio 2020".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg