“Pizzetta sfoglia”: sa licantzadoria casteddaja intrat in sos PAT

Sa retzeta traditzionale de Casteddu pronta pro conchistare s'Itàlia
31 Martzu 2022
in sa mesa

In sa Mesa - Sa "pizzetta sfoglia" est nàschida in Casteddu e pro custa resone est denumenada “casteddaja”. Rapresentat una licantzadoria e pro custa resone est intrada cun mèritu in sa categoria de sos PAT ("Prodotti Agroalimentari Tradizionali"). Ticat a pretzisare ca pro intrare in su registru de tutela, sos mandigos devent èssere "otènnidos cun mètodos de traballadura, cunservatzione, e istajonadura consolidados in su tempus”. Devent èssere finas “omogèneos in totu su territòriu interessadu, fatos segundu regulas traditzionales pro unu perìodu inferiore a bintighimbe annos".

Una retzeta, sa de sa "pizzetta sfoglia", chi est un'istitutzione casteddaja, unu màndigu chi est una bandera de identidade pro sa primu tzitade de Sardigna.

Difusu in totu s'ìsula, paris cun su caputzinu custu màndigu traditzionale acumpàngiat sos ismùrgios o si podet mandigare cun s'aperiente.

A forma de tundu, sa "pizzetta sfoglia" si faghet cun duos pìgios de pasta chi costoint unu prenimentu de bagna. Segundu de chie la faghet si podent annanghere peri tàpara e antzua.

La podimus agatare in onni tzilleri de Casteddu e finas in sas ofellerias.

in sa mesaCun s'insertada in su registru de sos PAT, pro sa "pizzetta sfoglia" est arribadu su reconnoschimentu ufitziale dae s'Istadu italianu. Su de sos PAT est un'elencu istituidu dae su Mipaaf ("Ministero delle politiche agricole, alimentari e forestali") chi serbit pro registrare sos alimentos chi caraterizant s'identidade gastronomica e agrìcula italiana e chi serbit peri a promotzionare sos produtos siat a livellu italianu siat foras dae s'Itàlia.

Ma cale est s'orìgine de sa retzeta totu casteddaja de sa "pizzetta sfoglia"? Comente e cando est lòmpida in tzitade? Peri fadende unu muntone de dimandas a sos paneteris, a sos ofelleris e a sos casteddajos anzianos non s'agatat peruna risposta. S'ùnica cosa chi si benit a ischire est ca custu mandigu at fatu sa cumparta sua inghìriu a sos annos de sa de duas gherras mundiales.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg