Sa Sardigna protagonista de su "Sana Slow Wine Fair" de Bologna

Sa primu editzione de sa manifestatzione dedicada a su binu bonu, netu e giustu
14 Martzu 2022
in sa mesa

In sa Mesa - Sa Sardigna at a èssere tra sos protagonistas de su "Sana Slow Wine Fair" de Bologna, sa manifestatzione aprontada de "BolognaFiere" cun sa diretzione artìstica de "Slow Food".

Sa primu editzione de "Sana Slow Wine Fair", adòbiu internatzionale de sa "Slow Wine Coalition", s'at a isboligare dae su 27 a su 29 de su mese de martzu 2022. At a èssere una manifestatzione dedicada a su binu bonu, netu e giustu, comente cheret su Manifestu de "Slow Food" pro su binu.

in sa mesaS'adòbiu bolognesu riunit unu nùmeru mannu tra produtores de binu e operadores chi traballant in sa filiera de su binu. Si faeddat de prus de 500 operadores, chi ant a lòmpere dae 18 Paisos pro presentare in Bologna sas etichetas issoro. Su Manifestu e s'acostiamentu de "Slow Food" a su binu s'est fatu prus craru dae su 2011, annu de sa nàschida de sa "Guida Slow Wine". Faeddamus de una craresa chi est divennida prus ladina gràtzias a sos progetos chi sunt ligados a sa ghia. Progetos chi naschent dae una consièntzia: ca su valore de su binu non podet èssere feti su chi est ligadu a su praghere de su tastu.

Sa Sardigna at a èssere presente cun sos binos suos, est a nàrrere cun sas ratzas de bide tìpicas de onni loto de terra sarda. S'ant a agatare sos binos chi donant su contributu issoro a s'istòria bingiatera de s'ìsula.

"Slow Wine Coalition" primu de lòmpere in "BolognaFiere" cun adòbios, tastos e "masterclass", s'at a abèrrere online cun tres dies de cunvegnos (dae su 22 a su 24 de su mese de martzu). Sos tres abòbios online ant a àere comente tema sa sustenibilidade ambientale, sa tutela de su paesàgiu e sa crèschida sotziale e culturale de sos sartos a inghìriu de su binu.

Sa primu die in presèntzia s'at a abèrrere cun un'assemblea plenària in ue, in unu documentu ùnicu, ant a èssere iscritos sos temas dibàtidos in sos adòbios online. Custu at a èssere unu resùmene de sa rivolutzione cherrida dae "Slow Wine Coalition" pro su mundu de su binu.

Sas tres dies de sa manifestatzione ant a èssere riservadas a sos operadores horeca. Sa die de domìniga 27 de martzu, imbetzes, est aberta a totus sos amantiosos de su binu, chi ant a pòdere intrare finas àteras duas dies, est a nàrrere lunis e martis. Pro intrare est bastante a s'iscrìere a una "masterclass".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg