“Agnello IGP” (Angione IGP): su "Consorzio di Tutela" bolat in Bartzellona pro Alimentaria 2022

In sa Mesa - S'"Agnello di Sardegna IGP"  (Angione de Sardigna IGP) bolat in Bartzellona pro sa "Fiera Alimentaria 2022". Andat in Catalugna peri gràtzias a sos prètzios record: 7,44 èuros a su chilu pesu biu in sas astas.

S'angione est lòmpidu in Bartzellona pro mèdiu de su "Consorzio per la Tutela dell'IGP Agnello di Sardegna" e s'agatat in sos padilliones de "Alimetaria", in su setore "Intercarn", su setore ispetzìficu de sa petza e de sas filieras suas.

Una presèntzia importante, sa de sa Sardigna, chi onni annu esportat in Ispagna 300mila angiones a marcu IGP. No est pro nudda ca pròpiu s'Ispagna est leada a cunsideru comente sa ghenna de sos mercados de sa petza de berbeghe. In Aràbia s'angione sardu IGP lompet gràtzias a sas tzertificatziones Haalal.

"Alimentaria", duncas, est una bella ocasione pro fàghere connòschere s'"Agnello di Sardegna IGP" e pro illargare su mercadu e fàghere lòmpere su marcu in sas cadenas de mega-mercados, distribudores retail e canale ho.re.ca. e GDO ("grande distribuzione organizzata").

Cun "Alimentaria" su "Consorzio per la Tutela dell'IGP Agnello di Sardegna" podet fàghere promotzione in presèntzia, duncas podet consolidare s'"export" suo e podet finas valorizare sa petza de angione IGP.

Leare parte a s'adòbiu catalanu aberrit prospetivas noas pro sa gestione de su produtu. Su chi serbit - at pretzisadu su diretore de su Contas - devet èssere una mudada in s'oferta de sa petza de angione, est a nàrrere ca tocat a bìere su mercadu ispagnolu comente un'oportunidade noa pro su marcu IGP.

Gràtzias a adòbios comente "Alimentaria" s'export de sa petza de angione IGP podet megiorare. Sempermai, pro lu faghere, tocat a ascurtare sas rechestas de su mercadu. In Ispagna, pro fàghere un'esèmpiu, cherent un'angione unu pagu prus mannu de s'angione de ses chilos chi còmporant in Sardigna. Duncas, s'istrategia est sa de disvariare sa produtzione chirchende cumprèndere su mercadu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22