Facussa, trigu cuarantinu e duos “drucis” in s’elencu de sos produtos de sa traditzione

Non sa pitzeta casteddaja ebbia
1 Arbili 2022
in sa mesa

In sa Mesa - Non sa pitzeta casteddaja ebbia. Cunforma a sos inditos de sa lege 238 de su 2016 e a sos de su decretu legislativu 173 de su 1998 (e duncas a su chi est istabilidu dae sa delìbera regionale de Giunta 56/41 de chimbe annos a como), s’Assessoradu de s'Agricultura e s’agentzia Laore ant arrichidu s’elencu de sos produtos traditzionales de sa Sardigna cun àteras bator prendas de su connotu culinàriu nostru: sa facussa; su trigu cuarantinu; su druci de scròcia, su druci de is pòberus (su siddini).

Sa facussa (connota in italianu comente "melone serpente o tortarello") est unu tipu de melone chi assimìgiat a su cugùmene ma abarrat prus durche e lu mandigamus còrgiu etotu. Longa pagu prus o mancu mesu metru, cun diàmetru de chimbe tzentìmetros, si presentat groga forte una bia lòmpida e cun purpa arba. Delicada tastende·la, finamentas ideale est pro nos nche catzare su sidis. Ma, prus a prestu, “a facussa” est unu de sos ingredientes printzipales de sa “capunadda”, ispetzialidade gastronòmica de su connotu tabarchinu cun tunnu salidu. Ambos s’afranzant dende a su pratu unu sabore ùnicu.

Artziende·nche a tretos de Murriali agatamus su trigu cuarantinu, cun cariòssides simigiantes a sas de su trigu martale e prus minudas cunforma a sas variedades de trigu ruju. Curtzas, istrintas e iscurigosas, nos donant unu 15% de proteinas e unu glùtine prus lèbiu. Ideale pro sos chi tenent unos cantos problemas alimentares. Cun custu tipu de trigu faghiant sas òstias pro cominigare sos pitzinnos.

Duos sos durches. Sos primos, de scròcia, sunt fatos de tzùcaru prenados cun pasta de mèndula e galu tzùcaru. Minudos, cun pesu intre sos 15 e sos 30 grammos, tenent formas diferentes (frùtora, animales e trastes de su connotu rurale) e sunt de colore arbu, francu sos decoros (a s’ispissu cun fògia indeorada). Malos a modellare, si non dae manu annestrada, pigant su nùmene dae sa forma issoro chi ammentat sa parte esterna de s’ou (cogòciu, scroxu etc.). Los faghent in Campidanu. E gasi etotu sos de sos pòberos, su siddini, cun pane, saba, mele, mèndula, còrgiu de arantzu e aromas impastados, cotos e postos in intro de unu mollu de linna.

M.P.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg