Parma: Sardigna protagonista mundiale de sa pitza

In sa categoria sena de glùtine de su "Campionato Mondiale della Pizza 2022" s'ìsula lompet a su de bator postos
14 Arbili 2022
in sa mesa

In sa Mesa - Sa Sardigna est istada protagonista de su "Campionato Mondiale della Pizza 2022". Unu campionadu chi ocannu est lòmpidu a sa de XXIX editziones. Su "Campionato Mondiale della Pizza 2022" s'est isboligadu in su "Palaverdi" de Parma dae su 5 a su 7 de su mese de abrile coladu. S'istràngiu ispetziale est istadu su "chef" Heinz Beck.

Su programma de sa tres dies est istadu ricu meda e at antitzipadu sas innovatziones de una tra sas pitantzas sìmbulu de su "Made in Italy". Su programma at àpidu comente "clou" sos disafios tra mastros de sa pitza lòmpidos dae diferentes logos de su mundu.

Sa pitza, tocat a lu pretzisare, faghet s'evolutzione sua a manera costante e interpretat bene meda sa mudada de su paladu e de sa chirca culinària in onni cugione de su pianeta. Margherita o Romana, fata cun ingredientes ispetziales o cun ingredientes traditzionales, sena de glùtine o cun produtos biològicos, fata in liama o in pàlia, podimus nàrrere ca cando si faeddat de pitza sas variatziones subra de su tema sunt infinitas.

In sa manifestatzione internatzionale de sa pitza, duncas, s'ìsula est lòmpida a su de bator postos in sa categoria sena de glùtine cun sa pitza batijada "Mamma Terra". Ant leadu parte a sa gara mastros de sa pitza lòmpidos dae unas cantas Natziones.

Unu resurtadu importante, cussu otentu dae s'iscuadra sarda fata dae Giuseppe Villani e Giuseppe Lapolla (giai campione de su mundu in categorias diferentes) de Cannigione, dae Dario Busceddu e Giorgia Rocca de Casteddu Sardu, dae sos casteddajos Giorgio Marras e Katiuscia Macis, dae Roberto Mereu de Santu Tiadòru de Uviddé, dae Cristian Ghisu de Macùmere e dae Nicolò Schirra de Tàtari.

Sas categorias in gara sunt istadas 12 pro 400 mastros de pitza lòmpidos dae totu su mundu. Sos sardos chi si sunt cualificados tra sos primos 50 in sa categoria pitza clàssica sunt istados tres.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg