“Vinitaly”: Sardigna protagonista cun 71 cantinas

In sa Mesa - Da eris, 10 de su mese de abrile, sa Sardigna est presente in su "Vinitaly" de Verona cun 71 cantinas. Su salone internatzionale de sos binos e sos distillados, chi est in programma dae su 10 a su 13 de su mese abrile, ocannu lompet a sa de chimbantabator editziones.

In su "stand" de sa Regione Autònoma de Sardigna s'agatat finas un'àrea dedicada a sa "Colletiva Sardegna". Sa "Colletiva Sardegna" est istada isseberada dae s'Assessoradu de s'Agricultura e Reforma Agropastorale e est cumposta dae 71 aziendas chi coltivant sa bide e faghent su binu. Sas 71 aziendas rapresentant sa produtzione de su binu sardu de calidade.

In sas tres dies de sa manifestatzione su "stand” istitutzionale de Sardigna at a èssere protagonista de unu calendàriu de addòbius ricu e meda interessante. Sos primos duos addòbios ant a èssere ghiados dae tastos de binu e casu e ant a èssere organizados in collaboratzione cun s'"Agenzia Agris".

Oe, lunis 11 de su mese de abrile a sas 10 sunt prevididos unos cantos addòbios cun sas delegatziones èsteras. Custos addòbios, aprontados dae Assessoradu de s'Agricultura e Reforma Agropastorale de sa Regione Autònoma de Sardigna, ant a sighire finas a cras.

Semper oe (lunis 11 de su mese de abrile) s'at a isboligare un'addòbiu aprontadu in duas bandas pro faeddare de unu tema interessante: sa "Filosofia dei salumi", ocasione chi at a àere comente protagonistas finas sos binos sardos.

Cras, martis 12 de su mese de abrile, a sas 12.00, imbetzes, s'at a isboligare "Racconti di tonno e di tonnare di Carloforte", mentras a sas 14.00 "Terre di Romangia" e  "Moscato di Sorso-Sennori DOC" ant a èssere sos protagonista de su merie. Sa die de traballos s'at a concluire a sas 16.00 cun "Storie di marinerie", un'addòbiu chi at a faeddare de binos e de coghina de mare sarda.

Pusticràs, mèrcuris 13 de su mese de abrile, a sas 12.00 s'at a isboligare "Viaggio alla scoperta della dolce Sardegna".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22