"ViniVeri - Vino secondo natura": sos binos sardos in Vènetu

"Cantine Neoneli" e "Raìca" de Terranoa rapresentant sa Sardigna in sa manifestatzione de Cerea
5 Arbili 2022
in sa mesa

In sa Mesa - Sos binos sardos bolant in Vènetu pro leare parte a "ViniVeri - Vino secondo natura", sa manifestatzione dedicada a su mundu de sos binos naturales chi ocannu lompet a sa de deghessete editziones.

"ViniVeri" s'at a isboligare in Cerea dae s'8 a su 10 de su mese de abrile in s'"Area Exp". A rapresentare sa Sardigna ant a èssere sos binos de duas realidades produtivas de primore: "Cantine Neoneli" e "Raìca" de Terranoa.

Manifestu de sustenibilidade ambientale, econòmica e ètica in bìngia e in cantina, ViniVeri si presentat comente un'adòbiu de importu mannu pro sa Sardigna e pro sas cantinas chi la rapresentant, est a nàrrere sa "Raìca" de Terranoa e sas "Cantine Neoneli".

Sa de "ViniVeri - Vino secondo natura" est una fiera dedicada a sos binos naturales e est promòvida dae su cunsòrtziu natzionale chi riunit sos bingiateris acumonados dae su rispetu de sos tziclos de sa natura.

"Raìca" de Terranoa e "Cantine Neoneli" coltivant sas bides issoro sighende sos printzìpios de s'agricultura biològica, una filosofia chi faghet produire su binu salvaguardende su paesàgiu rurale, ma finas respetende su traballu de s'òmine.

In "ViniVeri" sa riflessione de su mundu de su binu naturale s'at a isboligare pròpiu subra su tema de sa sustenibilidade ambientale, economica e ètica.

Pro sàbadu 9 de su mese de abrile est prevìdidu un'adòbiu cun tastos e sa presentatzione de su Manifestu "La forma e la sostanza, le luci e le ombre". S'adòbiu at a èssere ghiadu dae Sandro Sangiorgi paris cun sos bingiateris de su "Consorzio Viniveri".

Totus sas tres dies de sa manifestatzione ant a èssere indanimadas dae initziativas importantes e dae tastos saboridos. Difatis, sunt in programma duas chenas e un'adòbiu de aprofundimentu cun tastos. S'adòbiu est dedicadu a sos temas e a sos valore chi donant vida a su "Consorzio Viniveri".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg