"Aggiungi un pesce a tavola" s'initziativa chi valorizat su piscadu locale

Dae s'Agentzia "Laore Sardegna" règulas e consìgios pro mandigare su pische a manera sustenìbili
23 Maju 2022
in sa mesa

In sa Mesa – Comente amus giai antitzipadu, pro mèdiu de s'agentzia "Laore Sardegna" sa R.A.S. cumbidat a sos Sardos a mandigare pische a manera sustenìbili. Lu faghet cun un'initziativa finantziada dae su "Programma Operativo del Fondo europeo per gli affari marittimi e la pesca (PO FEAMP 2014-2020)". Unu programma chi valorizat su piscadu locale e chi at batijadu "Aggiungi un pesce a tavola".

S'initziativa de comunicatzione istitutzionale at sa finalidade de promovere su consumu de su piscadu locale prus pagu valorizadu, est a nàrrere su piscadu de istajone, e promovet finas sos pisches de allevamentu.

Paris cun s'Agentzia "Laore Sardegna" ant traballadu a "Aggiungi un pesce a tavola" su "Servizio pesca e acquacoltura" de s'Assessoradu regionale de s'agricultura e reforma agropastorale.

Sa campagna – si podet lèghere in su giassu de sa Regione Autònoma de Sardigna - at s'obietivu de ofèrrere a sa gente atinamentu e istrumentos de connoschèntzia noos, peri pro mèdiu de su cumpartzimentu de curiosidades e aprofundimentos.

Pro ofèrrere a sa gente atinamentu e istrumentos est però netzessàriu mòere dae s'eticheta. Duncas, tocat a connòschere e a ischire interpretare a manera currègida sas informatziones chi acumpangiant su pische. Custas informatziones sunt netzessàrias pro sestare s'”identikit” de su piscau e pro ischire dae ue arribat su pische.

Ma cale sunt sas informatziones chi tocat a garantire a sos chi còmporant su pische? Sighende su chi narat sa normativa, sos bendidores devent dare sas informatziones afatantes: sa denominatzione cummertziale e iscientìfica; su mètodu de produtzione (pisca in abba salida o durche, allevamentu); sa categoria de sos trastos de pisca impreados pro sa cassa; su prètziu de su pesu netu; su còdighe de sa zona de cassa segundu sa classificatzione de sa  FAO (es. Zona 37 = Mediterràneu e Mare Nieddu); s'istadu de su pische (friscu, cungeladu o decongeladu); àteros ingredientes possìbiles comente additivos o allergenes; su tempus mìnimu de cunservatzione (TMC).

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg