Sa Sardigna otenet su de duos postos in sa primu editzione de sos "Campionati mondiali di pizza a squadre" de Palermo

In sa Mesa - Resèssida manna pro s'ìsula: sa Sardigna otenet su de duos postos in sa primu editzione de sos "Campionati mondiali di pizza a squadre" de Palermo. Difatis, su "team" sardu batit a domo sa medàllia de prata.

A bolare a bia a sa Sitzìlia sunt istados sos maistros de sa pitza Emiliana Scarpa, de su ristorante "Sea Flower" de Su Sicu (Casteddu); Giuseppe Viola, de sa pitzeria "Zio Ciro" (Murera) e Marco Mulas. de sa pitzeria "bistrot" Entrigu (Casteddu).

Sos "Campionati mondiali di pizza a squadre" si sunt isboligados in intro de sos addòbios de Expocook, sas bator dies dedicadas a su mundu de sa ristoratzione.

Sos tres maistros de pitza sardos artziados in su pòdiu ant isbentuladu sa bandera de sos bator Moros, est a nàrrere sa bandera de Sardigna.

Tres giòvanos de adelentu, Scarpa, Viola e Mulas ant fatu onore a totu sa Sa Sardigna, ma massimamente a sa tzitade de Casteddu, presente cun s'istemma suo in sa divisa de su "team sardu". "Sa Comuna - ant pretzisadu sos tres maistros de pitza - at àpidu aficu in nois e s'at dadu su patrotzìniu".

Cuntentos de àere fatu onore a sa sa primu tzitade de Sardigna, sos tres sardos ant bìnchidu sa medàllia de prata cun tres pitzas diversas. Sa "pizza contemporanea" est istada fata dae Emiliana Scarpa. Est una pitza cun tomatighedda "datterino" de Pula, "burrata" fata cun late de Sardigna, tàpara sicada de Ceraxius, antzua de Sant'Antiogu e una crema de àgiu creada de Emiliana Scarpa, unu produtu chi at tra sos ingredientes àgiu de Arborea e fogias de rìgamu. Galu, Giuseppe Viola at bìnchidu cun una cumassa cun fenugru agreste pro una retzeta palermitana chi at comente ingredientes: gianchetos, "stracciatella" e pane tratacasadu. "Cagliari-Palermo andata e ritorno" est sa pitza isseberada dae Marco Mulas. Ingredientes? Crema de melinzana, "stracciatella", tomatighedda "confit", càmbara ruja, "guanciale" tzacarrosu.

Sos maistros de pitza sunt mòvidos a Sitzìlia cun s'obietivu de valorizare sos produtos de Sardigna e batint in s'ìsula una medàllia de prata chi los premiat pro su traballo issoro.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22