Annada bona meda pro sa cariasa de Sardigna

Su 2 de su mese de làmpadas in Bonàrcadu torrat sa "Sagra de sa Cariasa"
1 Làmpadas 2022
in sa mesa

In sa Mesa - Est un'annada bona meda pro sa cariasa de Sardigna. A lu nàrrere sunt sos produtores matessi. Pro afestare a custa frùtora, a pustis de duos annos de pandemia, cras, su 2 de su mese de làmpadas, torrat in Bonàrcadu sa de degheoto editziones de sa sagra de "Sa Cariasa Bonarcadesa".

Sa Sagra, chi est organizada dae s'assòtziu culturale Coro Bonàrcadu cun s'agiudu de s'amministratzione comunale, oferit unu programma interessante meda. "Sa frùtora bi est - pretzisant sos produtores - e est finas de calidade manna".

Sos chi ant a leare parte a sa manifestatzione ant a pòdere tastare sas cariasas bonarcadesas ofertas dae sos organizadores, ma ant a pòdere comporare peri sa frùtora in sas piolas ammaniadas a manera apòsita pro sa manifestatzione.

S'obietivu de “Sa Cariasa Bonarcadesa” est semper su de valorizare e promotzionare sa cariasa de Bonàrcadu. Sa cariasa, paris cun produtziones agrualimentares e a sas produtziones otentas dae su late, est ritènnida elementu de importu mannu pro s'economia locale. Non est pro nudda ca in sos annos colados s'amministratzione comunale, paris cun unos cantos produtores, aiat promovidu s'idea de creare unu marcu pro identificare e tutelare sa cariasa bonarcadesa, duncas pro la bèndere in intro de una retza ùnica. A dolu mannu su progetu non est andadu in antis, e oe, comente tando, sos produtores sighint a bèndere sa cariasa pro contu issoro.

Sa de degheoto editziones de sa sagra at a incumentzare a sas 11.00 dae Ortu Mannu, in ue ant a èssere ammaniadas sas piolas de bèndida. In su matessi logu, a sas 13.00, s'at a pòdere mandigare baratu. Su pràngiu at a èssere fatu totu cun produtos locales.

Galu in s'Ortu Mannu, a sas 18.00 su grupu "Armonia Sarda", paris cun Francesco Fais e Giacomo Crobu, at a propònnere un'istentu musicale.

No est totu. A sas 18.00 ant a incumentzare finas sos tastos de sas cariasas bonarcadesas e de su durche cun cariasa fatu dae su "chef" Giovanni Fais.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg