Màndigos sardos in Cracòvia

“Authentic Italian Table” at pòdidu ospitare unos cantos produtos de primore de su cumpartu agroalimentare sardu
17 Làmpadas 2022
in sa mesa

In sa Mesa - In intro de s’eventu “Authentic Italian Table” organizadu dae sa Càmera de cummèrtziu italiana in Polònia, sa tzitade de Cracòvia at pòdidu ospitare unos cantos produtos de primore de su cumpartu agroalimentare sardu.

Presente in terra polaca un’iscuadra prus chi non motivada cun sa punna de promòvere sa sabidoria e sos tastos de sa cultura gastronòmica nostra. In espositzione duos presìdios Slow food ("fiore sardo" e pompia) ma finamentas pane carasau e botarga.

S’eventu, chi ruiat a comintzos de custu mese, l’at moderadu Bartek Kiezun, giornalista nòdidu e iscritore de su panorama "food&wine" polacu. Dèghidu finamentas su logu: su ristorante Sant'Antioco, semper in Cracovia, de Stefano Congiu (de Lodine). Su chef barbaritzinu, cun seguresa e maneras dìligas, at propostu unu “menu” ponende paris connotu e creatividade pro cuntentare amantiosos de sa traditzione e tendèntzias noas. Intre sos assagiadores bi fiant sos “blogger” prus nòdidos de su setore in Polònia e sos titulares de sas mègius butegas alimentares de Cracòvia chi, in cussa ocasione, ant retzidu dae sa Càmera de Cummèrtziu italiana, comente prèmiu, su tzertificadu “Buy Italy” destinadu petzi a butegas e ristorantes chi cummèrtziant e proponent produtos autènticos de s’istadu italianu (e duncas finamentas sos de sa natzione sarda) in Polònia.

S'eventu “Authentic Italian Table”, organizadu in intro de sa prus manna atzione “True Italian Taste” de su Ministèriu de sos Afàrios esteros e de sa Cooperatzione internatzionale pro cumbàtere peri sos mercados de su mundu sa contrafatura alimentare ordimingiada pro isfrutare su “Made in Italy” cun sa trassa, est serbidu pro fàghere connòschere a sos presentes s’orìgine de sos produtos de sa terra e sa trasformatzione issoro in lìnia cun su sentidu de sas comunidades chi, cun cussos màndigos, si caraterizant aunende connotu e novidades.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg