In Portescusi sa tonnina ruja est sa reina de sa sagra 2022

Sa "Sagra del Tonno 2022" lompet ocannu a afestare mesu sèculu de vida
13 Làmpadas 2022
in sa mesa

In sa Mesa - In Portescusi sa tonnina ruja est reina de sa sagra de su 2022. Dae su 17 a su 19 de su mese de làmpadas, difatis, Portescusi si bestit a festa cun sa "Sagra del Tonno 2022". Sa sagra, aprontada dae s'"Associazione Turistica Pro Loco Portoscuso" cun su patrotzìniu de sa Comuna de Portescusi, lompet ocannu a afestare mesu sèculu de vida sua.

Gosi, sa "Sagra del Tonno" torrat a pustis de duos annos de pandemia e torrat in sa fòrmula lassada in sa de barantanoe editziones, est a nàrrere cun tres dies de festa chi ant a àere comente reina sa tonnina ruja.

Sa manifestatzione proponet unu programma ricu meda, cun mùsica "live" e cun sos "stand" de sos artesanos e de sos produtores enogastronomicos de su logu. Non est totu, pro ite su 18 e su 19 de su mese de làmpadas, sa festa at a èssere cundida cun tastos de màndigos fatos cun tonnina ruja. In prus, in sas dies de sa "Sagra del Tonno" at a èssere possìbile bisitare sa tonnara antiga de sa bidda, sa de "Su Pranu".

Tocat a pretzisare ca sa bìsita in sa tonnara abisòngiat de prenotatzione. Ogni bisita ghiada previdit màssimu 10 bisitadores e est aprontada dae s'assòtziu "Sa Fabbrica". De ogni manera tocat a iscrìere a s'indiritzu de posta eletrònica: prolocoportoscuso@tiscali.it, ma si podet finas telefonare a su nùmeru: 349 450 38 89.

Sàbadu 18 e domìniga 19 chi ant a bènnere, sas retzetas traditzionales s'ant a pòdere tastare a incumentzare dae sas 20.00. S'addòbiu, chi at comente protagonista sa coghina tìpica, s'at a isboligare in su "Lungomare Cristoforo Colombo", cun tastos de màndigos fatos cun tonnina ruja de su Surcis.

Su “menu” de sa de chimbanta editziones de "Sa Sagra del Tonno 2022" previdit: macarrones cun bagna de tonnina ruja; tonnina a sa portoscusesa; insalada de tonnina; pane, abba o binu, su durche e una tassa de Muscadellu. Su “menu” at unu costu de 15 èuros a conca.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg