Premiadas dae su "Gambero Rosso" sas paneterias mègius de Sardigna

Pbread de Casteddu batit torra a domo "Tre Pani". In sa "Guida Pane&Panettieri d'Italia 2023" finas àteras 10 paneterias chi conchistant sos "Due Pani"
27 Làmpadas 2022
in sa mesa

In sa Mesa - Finas ocannu "Gambero Rosso" at premiadu sas mègius paneterias de Sardigna. In sa "Guida Pane&Panettieri d'Italia 2023" torramus a agatare sa paneteria Pbread de Casteddu cun sos "Tre Pani". Àteras 10 paneterias de s'ìsula batint a domo "Due Pani".

Sa de bator editziones de sa "Guida Pane&Panettieri d'Italia", presentada in su "Spazio Fiel di Palazzo Brancaccio" de Roma, est istada organizada cun s'agiudu de s'azienda Petra-Molino, una realidade produtiva importante e ispetzializada in sa produtzione de farra de calidade arta. 

Sas paneterias chi sunt istadas premiadas cun sos "Tre Pani" dae sa "Guida Gambero Rosso" sunt 54 in totu. Tra sas sardas b'est feti sa paneteria chi Stefano Pibi at abertu in Casteddu in su 2017.

"Inoghe est sa màdrighe chi dominat sa produtzione”, si leghet in s'ischeda de sa paneteria Pbread, chi sighit -  “sa màdrighe est impreada a manera magistrale, ma massimamente paris cun trigu isseberadu e frutu de su traballu de molinos màstrinos". In sa paneteria Pbread - si leghet - "Su pane propostu sighit unu calendàriu de sa chida" Tra unos cantos panes s'agatant: su "pane del popolo", est a nàrrere su chi si comporat onni die; su pane cun farru e maltu; su pane fatu cun àteros laores; cun ispètzias; cun arrosu e àteru meda.

De onni manera, sa Pbread no est feti una pateneria. Pibi, difatis, est su "babbu" de panetones, pandoros e culumbas ùnicas, pitzas, croissant salidos e durches. Tocat a sutalineare, però, ca totu su chi bessit dae su forru de custu paradisu nuscosu est fìgiu de una chirca fata a sa minuda.

In sa "Guida Pane&Panettieri d'Italia 2023", paris cun sa paneteria de Pibi bi sunt finas àteras 10 paneterias sardas. Custas realidades batint a domo sos "Due Pani". Tra sos forros agatamus finas una "new entry", su "Forni Artigiano a Legna 'Su Civraxiu'” de Castiadas. Imbetzes, tra sas connoschèntzias betzas torramus a lèghere su nùmene de "Sa Moddixia" de Giàuni, de "Porta" de Gonnos,  de "Stagnin" de Carluforti, de "Gioi" de Igrèsias, de "Anticas Licanzias" de Nùgoro, de "Tundu" de Ulìana. Cunfirmadas peri "Nino Vacca" de Aristanis, "Kentos" de Arrolli e "Calabrò" de Sant'Antiogu.

Conchistant "Un Pane" sos "Fratelli Marteddu" de Santuidu , "Da Marò" de Casteddu e "Salvatore Fancellu" de Montresta.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa Mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg