In Sardigna su pecorinu istasionadu DOP est sena de latòsiu

In sa Mesa - Gràtzias a una chirca de "AGRIS Sardegna" e de "Consorzio tutela", in Sardigna si faeddat de pecorinu istasionadu DOP comente casu sena de latòsiu.

Su pecorinu sardu istasionadu DOP, difatis, est unu produtu chi non cuntennet latòsio; est finas unu produtu ricu de vitamina A, de Carche, de Fòsforu e de Zingu. In prus, est su casu chi at sa cantidade prus bàscia de sale tra totu cussu chi si produit in Sardigna.

No est totu, pro ite custu produtu est caraterizadu de una calidade nutritzionale arta de matèria grassa. Custa calidade est prus forte in sos meses tzentrales de sa istasionadura, est a nàrrere tra su mese de matzu e su mese de abrile.

Custos sunt sos datos essidos dae sa chirca fata de s'Agentzia regionale "AGRIS Sardegna". Sa chirca s'est isboligada cun s'agiudu de su "Consorzio di Tutela" e at sa punna de ismanniare sas connoschèntzias subra de su produtu istasionadu. In prus, durante s'istasionadura de custu casu, si cherret individuare s'evolutzione de sas caraterìsticas suas dae su puntu de annotu tecnològicu, chìmicu, nutritzionale e sensoriale.

A pustis, s'atentzione de sos chircadores at a èssere dirigida peri a su Pecorinu Sardu DOP durche.

Cun una produtzione tzertificada manna meda, su Pecorinu Sardu DOP rapresentat su segundu produtu pro s'indùstria de casu sarda. Lu pretzisat su Presidente de su "Consorzio di Tutela". De ogni manera, nointames sa crèschida costante de custos duos tipos de casu DOP (istasionadu e durche), tocat a pretzisare ca su pecorinu DOP est tra sos produtos prus pagu istudiados. Una mancàtzia manna, chi in die de oe est duncas istada cumpensada gràtzias a sa faina de chirca de "AGRIS Sardegna" e de su "Consorzio di Tutela".

A manera cumplessiva sunt istadas analizadas 126 formas de casu, prelevadas in s'istajone de su casu de s'annu coladu. Su casu est istadu leadu dae unu campione de casifìtzios chi rapresentant bene sa filiera e sa produtzione totale de casu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22