“Wine Experience”: sas duas dies de binu in Oscheri

Tastos, arte, “design” e addòbios dae s'1 a su 2 de su mese de trìulas
29 Làmpadas 2022
in sa mesa

In sa Mesa - Duas dies de binu in Oscheri. Dae s'1 a su 2 de su mese de trìulas, difatis, torrat "Wine Experience" ("Weo"). Sa manifestatzione s'at a isboligare tra su teatru comunale e sa pratza de sa bidda.

Ma cale sunt sas novidades de su 2022? Sa de su 2022 at a èssere un'editzione chi at a adopiare su nùmeru de sas cantinas: s'at a passare dae 60 a 120 cantinas. No est totu, pro ite sa de bator editziones de sa "Weo" at a èssere finas internatzionale e at afortiare su ligàmene tra territòriu, enologia, arte, artesanadu e "design".

Una manifestatzione chi at a àere comente protagonista su binu e su balore econòmicu suo, e peri su balore sotziale culturale e umanu; l'at sutalineadu Tigellio Danese, su Presidente de s'assòtziu "Wine Experience Oschiri", chi paris cun sa Comuna, organizat sa manifestatzione chi torrat onore a su binu.

Sas de Oscheri ant a èssere duas dies de cultura e de addòbios importantes cun rapresentantes de s'enologia sarda, italiana e finas internatzionale. Cun sos espertos s'at a chistionare de sa punna chi at su mercadu de su binu e de sas novidades tecnològicas in cantina e in bìngia.

In programma peri unu tastu a sa tzurpa de "Merlot". Su tastu at a èssere ghiadu dae s'enologu Mourad Ouada, in intro de una cumparàntzia tra produtores sardos, italianos e internatzionales. In s'ìnteri, gràtzias a artistas, "designer" e creativos, sa bidda at a contare su mundu de su binu. L'at a fàghere cun ses addòbios.

“S'editzione 2022 de sa manifestatzione de su binu” - pretzisat su sìndigu Roberto Carta - "pro Oscheri at a èssere su primu passu pro creare unu distretu de s'arte".

A indanimare "Wine Experience" ant a èssere sa mùsica e sas paràulas de Fabrizio Ruggero e de s'atore Stefano Cossu, su "Live Murale" de sas artistas Fiore Cao e Paola Pinna, sos "Botti d'Autore" de sos istudiantes de su Litzeu artìsticu de Terranoa "Fabrizio de Andrè", s'espositzione "Di Gemme e di Vino" a incuru de sa gemmologa Maura Danese e de su "sommelier" Andrea Balleri. In fines, no at a mancare sa mustra de Luigi Columbu "Vino fino in fondo", antitzipatzione de sa colletzione acumprida dae s'artista e muralista de Ulìana cun sa tècnica Vinarelli, est a nàrrere infundende su pinzellu in su Cannonau.

Sa "Weo" at a èssere finas su batiare de su primu binu in ampullas. Faeddamus de unu binu fatu dae sa primu cantina de Oscheri, sa Oskiros de Maria Perinu. At a èssere batijadu su binu "Malghesi", unu "Vermentino DOCG di Gallura".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg