Arcidànu: totu prontu pro sa de 21 editziones de sa sagra de sa berbeghe

Sa manifestatzione naschet pro promotzionare sos produtos enogastronòmicos de su territoriu
29 Argiolas 2022
in sa mesa

In sa Mesa - In Arcidànu est totu prontu pro acasagiare sa de 21 editziones de sa sagra de sa berbeghe, chi s'at a isboligare su 7 de su mese de austu chi at a bènnere in pratza Libertà e in s'àrea de sos giardinos pùblicos, serente a sos aposentos de sa domo comunale.

Comente semper, a organizare sa manifestazione gastonòmica at a èssere sa Pro Loco de sa bidda, chi pro s'editzione de ocannu at a àere finas s'agiudu de sos nàschidos in su 1970. S'apuntamentu, faghent ischire sos organizadores, at su patrotzìniu de sa comuna.

Ma ite s'at a mandigare pro custa editzione de sa sagra de sa berbeghe? “Malloredus” cun bagna de petza e unu pratu de sa traditzione: sa berbeghe coghinada a craddarzu, est a nàrrere sa petza de berbeghe fata còghere in su caddarzu cun abba e sale. Sa petza berbeghina, chi at a èssere sa protagonista de sa rassigna gastronòmica, at a èssere peri acumpangiada dae birdura e casu. No est acabada inoghe, pro ite sos organizadores ant pensadu a totu. Difatis, peri pro bufare ant aprontadu sas cosas a sa minuda e sa gente chi at a leare parte a sa sagra at a pòdere gustare sos binos de sas cantinas de sa zona.

Tocat a pretzisare ca custa no est una nova de pagu contu, pro ite sa sagra naschet pro promotzionare sos produtos enogastronòmicos de su territoriu.

Sa manifestatzione at a cumentzare a sas 20.00 e sa gente chi cherret leare parte a sa chena devet feti acuistare su billete. Custu s'at a pòdere comporare in su logu de s'atopu etotu. Inoghe at a èssere ativu finas unu “chiosco” chi at a organizare su servìtziu tzilleri pro totu sa durada de sa sagra.

Sa Pro Loco de Arcidànu e sos de sa leva de su 1970 ant pensadu peri a alligrare su sero cun sa mùsica. Pro s'ocasione ant a sonare s'artista casteddaia Panky Alma cun su grupu suo. S'ispetàculu musicale at a èssere partzidu in duos. In sa pasada sa gente at a pòdere finas a bìdere s'ispetacolu de s'isparatóriu a su tzocadore.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg