Sa Madalena: sa “Festa del Gusto” 2022

Festa de sabores dae gioja 14 a domìniga 17 de su mese de argiolas
13 Argiolas 2022
in sa mesa

In sa Mesa – Lompet pro sa primu borta a Sa Madalena. Semus faeddande de sa “Festa del Gusto”, chi pro s'editzione de su 2022 at a atopare madaleninos e turistas in s'ìsula ispantosa chi s'agatat a nord de Sardigna.

Ma ite est sa “Festa del Gusto”? Est una manifestatzione enogastronomica chi dae carchi annu si movet in sas localidades turìsticas de Sardigna. Sa punna de custa manifestazione est sa de fàghere connòschere a sa gente sos màndigos de sa coghina sarda, ma finas sos pratos de sa coghina italiana e de sa coghina internatzionale. Gosi, pro bator dies in su tzentru istòricu de Sa Madalena, sa pratza Umberto at a acasazare sas pessones chi ant a chèrrere leare parte a custa festa dedicada a sa coghina, e massimamente a su “street food”, est a nàrrere a sos màndigos chi si consumant camina camina. S'addòbiu est pro onni merie a sas 18.00 pagu prus o mancu.

Pro s'editzione de Sa Madalena sos chi ant organizadu sa “Festa del Gusto” ant fatu sas cosas cumpridas. Difatis su programma de sas bator dies previdit finas: dj set, ballos e àteros ispetàculos.

Sos organizzadores de sa manifestatzione de sos sabores faghent ischire ca sos màndigos ant a èssere bellos meda: sos bisitadores ant a tastare antipastos tìpicos, porcheddu arrustu, àtera petza fata a sa sarda, hamburger de berbeghe, ma finas seadas e àteros durches. Pro sa coghina internatzionale s'at a pòdere mandigare: sos tacos, sos burritos dae su Messicu; sos “hamburgher” e sos “hot dog” dae sos Istados Unidos; sa picanha brasiliana; s'asado dae s'Arzentina. Sa coghina italiana at a ofèrrere unos cantos pratos de Ligùria, comente sa “pasta al pesto” e sas “focacce liguri”; sos “panzerotti” dae sa Puglia; sos màndigos de sa coghina tìpica napoletana e finas cussos chi lompent da sa Sitzilia, comente sos cannolos sitzilianos e sos durches fatos cun sa mèndula.

Sa festa de Sa Madalena at a èssere finas una occasione importante pro sos birrifìtzios de Sardigna. Custas realidades produtivas, difatis, ant a èssere presentes in pratza Umberto cun sos stand issoro.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg