“Sardinia Food Awards” premiat sas prudutziones de primore de s'agrualimentare de Sardigna

Sa manifestatzione lompet a sa de sete editziones
14 Argiolas 2022
in sa mesa

In sa MesaIn su 2022 sos “Sardinia Food Awards” sunt lòmpidos a sa de sete editziones e comente in sos annos colados ant premiadu sas mègius produtziones de primore de s'ìsula nostra.

Sa tzerimònia de premiassione s'est isboligada su 9 de su mese de argiolas coladu a Pula, in sos aposentos de su Resort Is Molas.

Tocat a pretzisare ca ocannu sunt istadas 286 sas realidades sardas chi traballande in su campu de s'agrualimentare ant detzisu de leare parte a custu cuncursu e ca sunt istadas 30 in prus de su 2021.

Sos “Sardinia Food Awards” rapresentant una ocasione importante pro sas aziendas sardas, pro ite sunt un'oportunidade ùnica de l'as fàghere connèschere in su mundu de sos espertos de màndigos de primore. Comente semper, ocannu puru s'ànima de custa manifestatzione est istada sa giuria, un'iscuadra de professionistas chi ant dèpidu detzìdere a chie dare su marcu de primore, su matessi chi serbit a tzertificare sa calidade arta se sas produtziones.

No est acabada inoghe: sas aziendas binchidoras de custu cuncursu ant a èssere sighidas passu passu pro un'annu intreu dae s'iscadra de “Sardinia Food Awards”. Sos espertos ant a promotzionare sas realidades chi ant otentu su reconnoschimentu prus artu. L'ant a fàghere a indonu ponende in òpera initziativas de “marketing” e iniziativas cummertziales.

Comente in sas àteras editziones ocannu puru sas setziones de sos “Sardinia Food Awards” fiant unas cantas: binu, ògiu, mele, pasta, pane, butàriga, durches, gelados, insacados, casu, cusservas e marmelladas, licores e peri birra artesana, chi torrat in sa manifestatzione de su 2022 a pustis de àere àpidu una firmada in su 2021 pro more de sa pidèmia de COVID-19. E sos binchidores? Pro sa butàriga su reconnoschimentu prus artu andat a sa “Cooperativa Pescatori Tortolì” e a “Cabras Bottarga”; pro sa birra artesana binchet su “Birrificio 4Mori”; pro sos durches “Dolci e Panadas Oros de Domo”; in sa categoria gelados su prèmiu andat a sa “Gelateria Artigianale Napitia” e a “Druche Taste of Sardinia”; pro su casu binchet su “Caseificio Tertenia” pro sos insacados su primu postu l'otenet “Andrea Zoroddu la Bottega della carne”; pro su pane bio su “Panificio Sunnale”; pro su carasadu su “Panificio Murru e Lai”; pro su pane traditzionale su “Panificio Becciu” e su “Panificio Fancellu Salvatore”; pro sos licores binchet “San Martino Fabbrica liquori di Sardegna”; pro s'ògiu, segundu sas diferentes categorias: s' “Oleificio Sa Mola de Orri”, su “Nuovo Oleificio San Pasquale”, s' “Academia Olearia”, “s'Agriturismo il Giglio”, s' “Azienda Agricola Francesco Piras Corax”; pro su binu bichent sas “Cantine Sardus Pater”; pro sas conservas “Le conserve di Chicco” e pro su mele “Deus Apicoltura”.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg