Siddi: torrat “Appetitosamente – Festival Regionale del Buon Cibo” e faghet 15 annos

Sa manifestatzione dedicada su màndigu de calidade torrat a pustis de tres annos
19 Argiolas 2022
in sa mesa

In sa Mesa – A pustis de una firmada de tres annos, dae su 30 a su 31 de su mese de argiolas 2022 “Appetitosamente – Festival Regionale del Buon Cibo” lompet a sa de bìndighi editziones. Comente semper sa manifestazione s'at a isboligare in sa bidda de Siddi, su tzentru de sa Marmidda chi in die de oe contat 620 abitantes pagu prus o mancu.

Sa filosofia de s'editzione de su 2022 at a èssere cussa de semper: Siddi, chi dae prus de 70 annos est su tzentru rurale sardu de sa pasta, at a abèrrere sas ghennas suas acasagiande a sos visitatores. S'ànima de sas duas dies at a èssere sa matessi de sas editziones coladas, est a nàrrere ca sos protagonistas de su Festival ant a èssere su mandigu de calidade e s'arresonu asuba de su màndigu etotu. Difatis, pròpiu su màndigu rapresentat una espressione importante de cultura e de identidade.

Pro duas dies, duncas, Siddi at a rapresentare unu logu de atopos, de cumpartzimentu de ideas e finas unu tzentru abertu a sa divulgatzione de riflessiones ligadas a sos màndigos e a sa relatzione chi sos màndigos ant cun sos territòrios issoro. Ma no est totu, pro ite dae su 30 a su 31 de su mese de argiolas su Festival “Appetitosamente” at a èssere peri s'ocasione pro pòdere promòtzionare sos produtos agrualimentares de primore, pro dare sa possibilidade a sos produtores de fàghere connòschere sas produtziones issoro e pro donare sa matessi possibilidade a chie traballat custos produtos. Unu logu, duncas, in ue passu passu est possìbile costruire una consièntzia asuba de sa cultura alimentare e peri una ocasione importante de crèschida pro s'economia de su logu.

in sa mesa

Su programma de sa manifestatzione previdit atopos culturales de interessu, comente su chi est dedicadu a s'arrosu comente produtu de primore de Sardigna (sàbadu 30 de argiolas a sas 11.00); cussu dedicadu a sos durches, chi at a acollire sas espertas Anna Maria Sarritzu e Annalisa Atzeni ( sàbadu 30 de argiolas a sas 17); s'atopu asuba de su binu (domìnigu 31 de argiolas a sas 17.30); sos apuntamentos “Aggiungi un posto a tavola”, prevìdiu pro sàbadu a sas 22.15, cando at a èssere sa comunidade de Siddi etotu a acasagiare sos visitadores pro sa chena, e “Mangia come parli”, chi s'at a isboligare dae sas 21.00 de su 31 de argiolas e at a èssere s'ocasione pro mandigare sos pratos tìpicos de sos Siddesos.

In su programma non mancant sos apuntamentos dedicados a sa mùsica: su cuncertu de Raphael Gualazzi, chi at a atopare su pùblicu in sa Domo de s'Orcu; su de sos LAMEMOUR, in pratza Leonardo Da Vinci; su cuncertu de Elisabetta Steri e Andrea Ortu, chi pro s'arbèschida de domìnigu 30 de argiolas ant sonare in sa Domo de S'Orcu etotu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg