Torrat “Mediterraneo Vermentino” e lompet a sa de tres editziones

Sa manifestatzione est organizasa dae sa Cantina Su 'Entu
11 Argiolas 2022
in sa mesa

In sa Mesa Su 15 de su mese de argiolas chi at a bènnere at a torrare “Mediterraneo Vermentino”. Sos meres de sa Cantina Su 'Entu de Seddori ant a acasagiare s'atopu dedicadu a su su Vermentinu in sos aposentos de sa cantina issoro.

Tocat a nàrrere ca sa manifestatzione, chi ocannu lompet a sa de tres editziones, torrat cun s'apuntamentu solitu de s'istadiale e lu faghet a pustis de duos annos de arrestu cajonadu dae sa pandemia de covid-19.

A sa manifestatzione ant leare parte cantinas de Sardigna e finas cantinas de Toscana e de Ligùria. Sa Sardigna at a èssere rapresentada dae sa gadduresa La Contralta de Lu Palau, dae sa Cantina Mesa de Arresi e dae sos meres de domo etotu, est a nàrrere dae sa famìlia Pilloni de sa Cantina Su 'Entu. Sa Toscana, imbetzes, at a èssere rapresentada dae sa “Tenuta Sassoregale” de Civitella Marittima, mentres sa Ligùria at a èssere presente cun “La Baia del Sole – Cantine Federici” de Luni. No est totu, pro ite gràtzias a su ligàmine cun su cuncursu enològicu internatzionale “Vermentino” at a èssere finas possibile tastare unos cantos binos chi lompent da sa Còssiga.

Sa manifestatzione at a incumentzare a sas 19.00 cun sos tastos de sos Vermentinos. In programma a sas 19.30 su dibatu asuba de su tema “Il Vermentino e il mare. Dialogo tra i produttori del Mediterraneo”. Ant a leare parte a su dibatu: Roberta Pilloni e Gianluca Ventroni de sa Cantina Su 'Entu; Giuseppe Carrus, chi coordinat sa “Guida Vini del Gambero Rosso”; Robero Gariup de “La Contralta”; Stefano Cova de sa Cantina Mesa; Andrea Daldin de sa “Tenuta Sassoregale” e Giulio Federici de “La Baia del Sole – Cantine Federici”. Su giornalista de “Il Sole 24 Ore” Giambattista Marchetto at a ghiare su debatu.

A sas 20.00 su protagonista de sa manifestazione at a èssere su “street food”, metres a sas 20.30 est in programma sa letzione ““L’incredibile viaggio del cibo attraverso il bacino del Mediterraneo” cun su giornalista Giovanni Fancello, cun Valeria Pilloni de sa Cantina Su 'Entu e cun su “chef” Davide Atzeni de Coxinendi.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg