Dae su 3 de austu Casteddu acollit sa "Festa del Gusto"

Custa manifestatzione gastronòmica at giai fatu 5000 chilòmetros in totu s'ìsula
2 Austu 2022
in sa mesa

In sa MesaA pustis de un'annu torrat in Marina Piccola una manifestatzione gastronòmica chi s'annu coladu at agradadu meda a su paladu de sos chi bivent in sa primu tzitade de Sardigna e non feti. Semus faedda·nde de sa “Festa del Gusto”, un'apuntamentu chi cras, 3 de su mese de austu 2022, at a lòmpere a sa primu firmada de sa marina prus amada dae sos casteddajos. Una festa chi in Casteddu at a durare unas cantas dies, dae su 3 a su 28 de austu.

Tocat a pretzisare ca custa manifestatzione gastronòmica at giai fatu 5000 chilòmetros in totu s'ìsula cun firmadas in sos tzentros turìsticos prus importantes de Sardigna.

Ma ite est sa “Festa del Gusto”? Podimus nàrrere chi est una rassigna gastronòmica importante in ue sos bisitadores ant a mandigare sos pratos mègius de su “street food” sardu e finas de cussu italianu e internatzionale. Pro dare un'idea de su chi semus narende bastant sos nùmeros. Difatis tocat a pretzisare chi ant a èssere sa bellesa de 100 sas propostas de màndigos chi ant a prenare de nuscos bellos e bonos sas nares de sos bisitadores chi ant a gustare sos pratos.

Ant a èssere unos cantos sos protagonistas de sa festa. Tra custos b'at a èssere su porcheddu arrustu, chi paris a àteros màndigos famados de sa coghina traditzionale sarda, comente sa seada, est a nàrrere sa reina de sos durches de Sardigna, at a accollire sos istràngios e massimamente at a promotzionare su territòriu sardu.

Ma no est totu, pro ite sa “Festa del Gusto” cuat unas cantas cosas ispantosas. Pro fàghere un'esempru, in su stand de su Mèssicu s'at a coghinare tacos e burritos; in su stand brasilianu sos coghineris ant a fàghere sa picanha; in su de Argentina ant a coghinare s'asado.

Ant a èssere unos cantos finas sos stand italianos: sos coghineris de Ligùria ant a fàghere sa pasta cun su “pesto”, sa “paranza”, sa “pasta di mare”; sos de Abruzu ant a arrustire sos “arrosticini”, sos de Puglia ant a fàghere sos “panzerotti”, in su stand de Sitzilia b'ant a èssere “arancini”, “cannoli”, durches cun mèndula.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg