"Etto": sa carnitzeria casteddaja chi at realizadu unu progetu in ue su protagonista est su màndigu sustenìbile

Sos meres de "Etto" ant sa punna de valorizare sos produtos alimentares locales
17 Austu 2022
in sa mesa

In sa Mesa - Si lamat "Etto" e est una carnitzeria chi s'agatat in Casteddu; si bolimus èssere prus pretzisos "Etto" est in su bighinadu de Stampaxi e sos meres suos ant realizadu unu progetu in ue su màndigu sustenìbile de Sardigna est su protagonista de una faina chi dae carchi tempus est faghende faeddare de sei.

Comente est possìbile chi una carnitzeria siat divènnida un'atividade famada? Su progetu de "Etto" est nàschidu in su mese de idas de su 2019 dae sa conca de Pierluigi Fais. S'idea sua est istada sa de realizare una carnitzeria moderna cumentzende de un'atividade de bèndida de petza chi giai s'agatàt in su bighinadu de Stampaxi. "Etto", però, non cheret èssere una carnitzeria comente sas àteras: sos meres suos ant sa punna de valorizare sos produtos alimentares de su logu. Gosi, chie còmporat dae "Etto" est seguru de mandigare feti petza de primore, petza de bèstias chi podent pàschere lìberas in sos sartos de Sardigna, mandigande murta e modditza. Dae "Etto" si podet comporare petza chi pro su prus est allevada in su Montiferru, est a nàrrere in sa regione in ue Fais etotu est nàschidu.

Onni chida Pierluigi Fais si faghet acumpangiare dae su carnatzeri chi traballat dae "Etto". Paris bìsitant unos cantos allevamentos sardos e issèberant sa petza chi podimus agatare in bèndida in sa carnitzeria de Stampaxi: est totu petza bella, petza de bèstias chi non si ghetant in corpus màndigos chìmicos ma chi màndigant cosas bonas, cosas chi donant unu sabore licanzu a sa bèstia etotu. Custu est su chi si podet comporare in custa carnitzeria casteddaja.


Cando est nàschidu, su progetu de Farris aiat feti sa punna de bèndere petza de porcheddu, berbeghe, puddu e malloru. Ma dae su mese de abrile de su 2020 Fais depiat cumentzare un'àtera atividade, est a nàrrere ca a de note sa carnitzeria si depiat mudare in "bistrot", un'atividade in ue mandigare sa petza bella chi a mangianu s'agatàt in su bancu de su carnatzeri. In su mese de martzu 2020, però, comente si ischit est lompida sa pesta de su covid-19 e agoa de su covid sas dificultades cajonadas dae su "lockdown". Gosi, "Etto" at cumentzadu a traballare coghinande e faghende arribare sos màndigos prontos a sas domos de sos casteddajos. Est nàschida duncas sa "gastronomia" de Etto, chi rapresentat un'elementu importante de unu progetu chi at su coro in Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg