Figari valorizat su produtu locale cun sa "Sagra del Pesce"

In sa Mesa – In Figari est totu prontu pro sa "Sagra del Pesce" in programma su 14 de austu; faeddamus de un'apuntamentu de interessu pro sos amantiosos de sa coghina e finas pro su tzentru de su nord de sa Sardigna; una manifestatzione de sa traditzione chi at otentu su marcu "sagra de calidade" dae s'"Unione Nazionale Pro Loco d'Italia", un'atopu chi valorizat sa gastronomia e su produtu locale, un'apuntamentu famadu meda chi ocannu lompet a sa de 55 editziones.

Tocat a sutalineare ca sa "Sagra del Pesce" de Figari est istada reconnòschida dae su Senadu de sa "Repùblica Italiana" comente manifestatzione de importu.

Cun sos 55 annos suos s'editzione de su 2022 est sa lòmpida de una tarea importante. Una tarea chi arribat a pustis de duos annos de firmada fortzada, una firmada cajonada dae sa difusione de sa pesta de su coronavirus.

Comente pro sas editziones coladas, in sa pratza chi s'agatat in cara de sa Domo Comunale, ant a èssere organizadas sas mesas cun sas padeddas in ue ant a èssere coghinados unos cantos cuintales de calamaros, càmbaras e àteros pisches. Pro custa editzione sos organizadores ant finas pensadu de realizare unu caminu de tastos in ue sos bisitadores ant a pòdere iscobèrrere sas tècnicas mègius pro coghinare su pische e peri comente reconnòschere cando su pische est friscu. Durante sa passigiada sos bisitadores ant a pòdere tastare sos màndigos bonos chi ant a èssere aprontados dae sos coghineris de sa manifestatzione.

Ma no est totu, pro ite comente onni sagra fata comente si depet finas sa "Sagra del Pesce" de Figari at in programma unu momentu dedicadu a sa mùsica. Gosi, dae sas 22.00, in pratza Cossiga sa boghe de Valentino Villy de su grupu "Come nelle favole" at a cantare sas cantzones de Vasco Rossi regordande s'istòricu cuntzertu fatu dae s'artista in su Modena Park.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22