Lompet a sa de 10 editziones su cuncursu regionale de sa seada

Sa seada est unu durche chi at otentu su marcu PAT
23 Austu 2022
in sa mesa

In sa Mesa - Sa seada, durche de sa traditzione sarda famadu meda in totue, finas foras dae sas làcanas de Sardigna, est tra sos produtos de sa gastronomia de s'ìsula nostra chi ant su marcu PAT, est a nàrrere ca custu durche at otentu su reconnoschimentu de “Prodotto Agroalimentare Tradizionale”. S'elencu de sos PAT – lu ammentamus – est aprontadu dae su “Ministero delle politiche agricole alimentari e forestali” de s'istadu italianu segundu su decretu de su 18 de su mese de trìulas de su 2008.

Ma pro ite oe faeddamus de custu durche traditzionale? Sa resone est simple: comente si podet lèghere in su giassu internet de sa Regione Autònoma de Sardigna, sa comuna de Olothene, paris cun s'”Agenzia Laore”, cun su “CNA Alimentare Sardegna” e cun s' “Unione Regionale Cuochi” at organizadu sa de 10 editziones de su “Concorso regionale della seada”.

Sa manifestatzione gastronòmica – si leghet in su giassu etotu - at sa punna de promotzionare sa cultura e sa connoschèntzia de sas produtziones de calidade e est un'apuntamentu destinadu feti a sas realidades produtivas chi ant domo in Sardigna.

Chie cheret leare parte a su concursu devet imbiare sa dimanda pro mèdiu de posta, o puru imbiande una mail o cunsignande sa dimanda in sas sedes de “Laore Sardegna” de Macumère (e-mail: antoniogavinoarca@agenzialaore.it) o puru in sa sede casteddaia de su CNA (e-mail: madessi@cnasardegna.it). Sos produtores ant a dèvere imbiare peri sas produtziones issoro e allegare s'ischeda de identificatzione de sos durches.

In prus, sos produtores etotu ant a dèvere imbiare o cunsignare sa dimanda intro sas 14:00 de su 26 de austu 2022, mentres pro sa sas produtziones tocat a las cunsignare tra sas 8:00 e sas 14:00 de su 31 de austu 2022 e intro sas 8:00 de sa primu die de cabudanni.

Sos produtos ant a èssere giuigados dae una cummissione de espertos. Sa premiatzione de sos binchidores est in programma pro su 4 de cabudanni chi at a bènnere in Olothene.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg