Pro sa prima borta dae tempus meda est istada impedida sa fuliada de sos produtos ortofrutìculos immagasinados

Faeddat su Presidente de "Confagricoltura Sardegna" Paolo Mele
19 Austu 2022
in sa mesa

In sa Mesa - Mancari sa crisi e sas dificultades, in sos sartos sardos brotant sas bonas noas in contu de produtzione ortofrutìcula. Antis, est dae custas crititzidades chi essint unos cantos profetos pro sos produtores de sìndria, de melone e de tomata. Lu narat su Presidente de Confagricoltura Sardegna Paolo Mele faeddende de «crèschida manna de sos costos de produtzione intre carburante agrìculu, energia, contzimes e prantàrgia», e de «sa farta de manodòpera e sas timorias de restritziones pandèmicas noas pro su cumpartu turìsticu e de sa ristoratzione». Cosas chi ant cumbìnchidu sos massajos «a reduire sa sèmena de unos cantos produtos».

Una collida prus minore, duncas, chi ocannu at «permìtidu de guvernare su mercadu cun prejos prus dignos reconnotos a sos massajos». De prus: pro sa prima borta dae tempus meda, custa cosa at impedidu sa fuliada de sos produtos immagasinados non prus a tretu de èssere bèndidos.

Ma b’at àteru: unu contributu a custu resurtadu de “isprecu zero” e de prejos bonos de bèndida l’at ingendradu sa mèngua de sas produtziones pro more de sa sicagna chi at corfadu su nord Itàlia. Una cosa chi at permìtidu a sas aziendas sardas de cròmpere mègius a su mercadu internu isulanu e, gasi etotu, a su mercadu de sa penìsula barigadu su Tirrenu. E in contu de calidade de sas produtziones cheret chi b’annanghemus finamentas su clima prus chi non caente chi at artziadu su livellu de custas prendas de campu. L’at acraridu bene s’agrònomu Giovanni Sanna: «Su calore anòmalu e sicu de custu istiu e sa possibilidade de pòdere abbare cun costàntzia ant permìtidu a sos fundos de crèschere cun losania sena sos problemas fitosanitàrios (atacu de babbois e parassitas) de sos annos colados. Cosa chi at determinadu prus pagos tratamentos in sas colturas cunsignende a su consumadore produtos istraordinàrios in contu de gustu e de calidade».

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg