A sa de XXIX editziones sa “Sagra del Miele” de Gùspini

Sa manifestatzione est organizada dae sa Pro loco guspinesa e dae s'Assesoradu de sa Cultura e de su Turismu de sa comuna
24 Austu 2022
in sa mesa

In sa Mesa - Est un'apuntamentu de interessu chi si rennovat dae binti-noe annos, un'atopu de importu pro totu su Campidanu de Mesu e pro sa Sardigna intrea. Ocannu est in programma pro sas dies de su 27 e de su 28 de austu. Ma de ite semus faeddande? Faeddamus de sa de XXIX editziones de sa “Sagra del Miele” de Gùspini chi torrat a si bestire cun sa “bestimenta” de sa festa prus manna a pustis de duos annos de pandemia cajonada dae su virus covid-19.

Sa sagra de su mele de Gùspini est organizada dae s'assòtziu Pro-Loco de sa bidda paris cun s'Assesoradu de sa Cultura e de su Turismu de sa comuna etotu.

Pro duas dies sa sagra at a cumintzare a mangianu e at a sighire finas a sero. Su mele – si podet lèghere in su giassu internet de sa Comuna de su Campidanu de Mesu – at a èssere su protagonista prus importante de sa rassigna. Sa manifestatzione gastronòmica, però, no at a promotzionare feti su produtu otentu dae su traballu de sas abes. Difatis, sos organizadores ant aprontau unos cantos atopos dedicados a s'isport, a su turismu e finas atopos de ispetàculu e laboratòrios pro sos pitzinnos chi pertocant a su mele.

Tra sos diversos apuntamentos tocat a arregordare su cun sa de 22 editziones de su cuncursu regionale “Premio Qualità Mieli tipici della Sardegna”, chi comente narat su nùmene suo at a premiare a sos meles sardos tìpicos e de calidade. Cust'atopu - lu ammentamus - est organizadu dae sa Pro-Loco guspinesa. Gosi, durante sas dies de sàbudu e domìniga chi ant a bènnere, sos bisitadores ant a pòdere tastare sos meles proclamados binchidores dae sos giuighes de su cuncursu. In programma finas su tastu de recotu cun mele.

Tra sos apuntamentos previdios in su programma de sa manifestatzione b'est peri sa mustra intitulada ““Dal fiore al Miele” e s'atopu “I Saperi locali: s’unguentu de cera noa” aprontadu dae sa Pro-Loco.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg