Totu prontu pro sa de 36 editziones de sa "Sagra del pesce" de Giorgino

Su coro de sa manifestatzione gastronòmica s'at a isboligare su 4 de cabudanni
30 Austu 2022
in sa mesa

In sa Mesa -- Est totu prontu pro sa de 36 editziones de sa "Sagra del pesce", chi ocannu at a torrare a Giorgino cun sa coghina de mare de sos casteddajos. S'atopu enogastronòmicu, chi est famadu meda in su sud de s'ìsula, est in programma pro su 31 de su mese de austu e pro sas dies de su 3 e de su 4 de su mese de cabudanni chi ant a bènnere.

Mariano Strazzeri, su Presidente de su Comitadu chi organizat custa manifestatzione, faghet ischire ca sa de 36 editziones de sa sagra de su pische de Giorgino at a rapresentare un'apuntamentu importante e ca comente semper cust'atopu at a èssere dedicadu a su paladu. Pro acollire sos bisitadores, difatis, sos organizadores ant giai aprontadu 2000 chilos de piscadu pagu prus o mancu. Su datu est de interessu e sos nùmeros faeddant bene de s'importàntzia de custa sagra.

Sa manifestatzione at a cumentzare su 31 de austu cun sa projetzione de su film "Non è Giorgino" de su regista Davide Melis. Sos ispetàculos s'ant a aunire a sos tastos de sa coghina de mare e ant a sighire su 3 de cabudanni cun "Gaspar Perissinot", chi est in programma dae sa 19.00; dae sas 21.30 sa mùsica de sos "Free time" e de "Vincenzo Music" at a allegrare su sero.

Su coro de sa manifestatzione chi at a promotzionare sa coghina traditzionale casteddaja de mare s'at a isboligare domìnigu 4 de cabudanni dae sas 20.00, cando sos bisitadores ant a pòdere mandigare sos pratos mègius de sa gastronomia de sa primu tzitade de Sardigna. Faeddamus de su prupu a sa schiscionera, de sa burrida, de su pische a colletu, chi comente s'ischit est unu màndigu fatu cun fae e isaboridu cun àgiu e menta, de lissa e de sardina arrustidas, de su pische frissu a sa manera de Casteddu. Sempermai semus faeddande de sos màndigos de sa coghina populare de sos casteddajos. Sos pratos ant a èssere acumpangiados dae una tassa de Vermentinu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg