Valorizare su setore de sa pisca: prontu unu cursu aprontadu dae "Laore Sardegna"

Onni cursu at a durare 50 oras
16 Austu 2022
in sa mesa

In sa Mesa – Est totu prontu pro sa sèrie de letziones chi pertocant a su setore de sa pisca. Sos atopos, chi ant sa punna de agiornare sos chi traballant in custu campu importante de sa produtzione econòmica sarda, sunt organizados dae s' “Agenzia Laore Sardegna”. Lu podimus lèghere in su giassu internet de S'Agenzia regionale etotu.

Sos cursos ant a èssere tres in totu, duos de custos ant a èssere dedicados a sos piscadores. Onni cursu at a durare 50 oras e at a èssere ativadu feti si b'ant a èssere a su mancu 15 pessones iscritas. Su nùmeru màssimu de iscritos est de 20 pessones.

Una parte de sas letziones at a èssere teòrica e sos espertos l'ant a fàghere cun unas cantas videu-cunferèntzias; un'àtera parte de sos atopos ant a èssere letziones de pràtica.

Tocat a sutalineare ca custa filera de apuntamentos rapresentant una ocasione importante meda pro su setore de sa pisca e pro s'agiornamentu netzessàriu a sos traballadores suos. Difatis - lu depimus regordare - sa pisca e sa trasformatzione de sos produtos suos rapresentant unu parte importante de s'economia de Sardigna, una parte chi pertocat massimamente a su chi mandigamus e aparitzamus in su pratu. Pro custa resone s'organismu chi at organizadu custos cursos est s'“Agenzia Laore Sardegna”, est a nàrrere un'ente chi est nàschidu cun sa punna de valorizare sas produtziones agroalimentares sardas.

Sos chi cherrent leare parte a custa sèrie de letziones teòricas e pràticas ant a dèpere fàghere s'iscritzione intro su 6 de su mese de cabudanni 2022.

S'initziativa – si podet lèghere in su giassu de sa Regione Autònoma de Sardigna – est tra sas atividades aprontadas dae s'Assesoradu de s'Agricoltura e Reforma agro-pastorale de sa RAS.

Pro leare parte a sos cursos tocat a presentare sa dimanda sighinde sas istrutziones chi s'agatant in su giassu de sa Regione Autònoma de Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg