Dae su “Gambero Rosso” “Tre Spicchi” a bator pitzerias de Sardigna

Àteras 12 pitzerias sardas batint a domo “Due Spicchi”
27 Cabudanni 2022
in sa mesa

In sa Mesa - Madrigat su nùmeru de sas pitzerias sardas chi batint a domo sos "Tre Spicchi" assignados dae sa ghia "Pizzerie d'Italia" de su giornale de enogastronomia "Gambero Rosso".

Sa ghia at fatu sa primu bessida sua in su 2013 cun sa punna de assentare su mundu de sa pitza, avalorende sos mastros mannos, sos artesanos chi sunt cumbintos de sa netzessidade de faeddare cun sa traditzione, incaminende gosi subra sas cumassas, sa traballadura e s'issèberu de sas matèrias primàrgias.

In Sardigna sa ghia at premiadu cun su màssimu reconnoschimentu sa pitzeria "Framento" de Casteddu, sa pitzeria "Re | Mi" de Tàtari, sa pitzeria Bosco de Tèmpiu e sa pitzeria Maiori de "Palazzo Doglio", est a nàrrere s'"urban resort" de Casteddu.

A lòmpere a su primu postu est sa pitzeria casteddaja "Framento" chi leat 92 puntos, mentras sa tataresa Re | Mi cunfirmat sos 91puntos de s'annu coladu. No est acabada inoghe, pro ite batint a domo 90 puntos sa pitzeria Bosco de Tèmpiu e sa pitzeria Maiori de Casteddu, chi rapresentat un'intrada noa in su mundu de sos "Tre Spicchi" sardos.

Duncas, in sa ghia sa Sardigna at tres cunfirmas e una novidade. Non est totu, pro ite faghent bolare su nùmene de s'ìsula àteras 12 pitzerias chi ant otentu sos "Due Spicchi" dae sa ghia "Pizzerie d'Italia". Semus faeddande de sa pitzeria "Refettorio" de s'Alighera e de sa pitzeria "Grains" de Casteddu. Semper in Casteddu sunt istadas premiadas sa pitzeria "Levante", sa pitzeria "Impasto", sa pitzeria "Pbread" e sa pitzeria "Sa Scolla". Galu, "Due Spicchi" sunt istados dados a sa pitzeria "Poppy's" de Crabònia, a sa pitzeria "Pomata" de Carluforti, a sa pitzeria "S'Arzola" de Oroteddi, a sa pitzeria "Ibiscus" de Cuartu Sant'Alèni, a sa pitzeria "Ada" de Santu Sparau e a sa pitzeria "Rubiu Brew Pub" de Sant'Antiogu. Ma no est galu acabada inoghe: sa Sardigna si ponet in butzaca finas "Uno Spicchio". A lu otènnere est sa pitzeria "Sa Prentza" di Sèneghe.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg