“Porta 1918” de Casteddu premiada dae Street food “Gambero Rosso”

Sunt 11 sos indiritzos premiados dae sa ghia
28 Cabudanni 2022
in sa mesa

In sa Mesa - Sa ghia "Street food 2023" fata de sos espertos de "Gambero Rosso" at dadu reconnoschimentos importantes a su street food sardu. A èssere istada giuigada paneteria mègius de Sardigna est "Porta 1918" de Casteddu, sa paneteria de carrera Mameli chi at sas raighinas suas in Gonnos. Pro sa ghia "street food 2023", difatis, "Porta 1918" est sa mègius firmada in Sardigna pro fàghere una pichetada in carrera.

Semper e cando, "Porta1918" non est s'ùnicu "street food" de s'ìsula. In sa ghia "Street food 2023", difatis, sunt istados indicados finas àteros 11 logos de "street food". Tra custos b'est peri un'intrada noa: sa "Prosciutteria Saint Miguel" de S'Alighera.

Sos logos de su "street food" premiados dae sa ghia "Gambero Rosso" sunt "La Mallicca" e "Panino.eat" de Casteddu, "Milese" de S'Alighera, "Cibum" de Aristanis, "Rosticceria Paninoteca F.lli Lai" de Nùgoro, "Fainè Sassu", "Mangatia" e "Sale & Pepe" de Tàtari e "da Gisa" de Carluforti.

Sa ghia, realizada cun s'agiudu de "Terre Margaritelli", est istada presentada in su "Spazio Field" de "Palazzo Brancaccio" in Roma e at 473 indiritzos. Tra custos, in prus de sos campiones regionales, unu pro onni regione, bi sunt finas àteros indiritzos.

Su reconnoschimentu dadu a onni atividade regionale leat in aprètziu su traballu fatu cun su màndigu de carrera, chi oramai aunit coghina tìpica e coghina esòtica cun fòrmulas noas e innovativas. Est inoghe ca s'introduit "Porta 1918". Sos màndigos suos, difatis, sunt su resumu de traditzione e innovatzione.

Tra sas propostas de su menu de "Porta 1918" agatamus su "fregolino", una genia de supplì fatu cun frègula e cun bagna a sa campidanesa. De tastare finas sas pitzetas prenas cun sa matza de sos culurgiones, e sas pitzas in làmia cun birdura de s'ortu e ògiu de Gonnos. Tocat a lu sutalineare: totus sos produtos de “Porta 1918” faeddant de sa terra e de sa coghina sarda.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags

In sa mesa

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

Image
logo-ras65-1024x257.jpg