Sa comuna de Crabas promotzionat sa botàriga de lissa

In sa Mesa - At a èssere un'àtera ocasione importante pro afestare unu tra sos produtos de sa coghina sarda de mare prus famadu in totu su mundu. Semus faeddande de sa botàriga de lissa, una produtzione chi connoschent bene in sa regione lagunare a inghìriu de Aristanis.

Ma pro ite faeddamus de custu produtu de sa coghina tìpica sarda? Pro ite pro lu promotzionare sa comuna de Crabas, bidda chi, comente s'ischit, est produtora manna de custu màndigu, at detzìdidu de organizare unu festival chi est in programma in sas dies de su 9, de su 10 e de s'11 de su mese de cabudanni chi ant a bènnere.

Sas tres dies ant a èssere un'ocasione pro tastare pratos fatos cun botàriga e finas unu momentu de interessu chi at s'obietivu de promotzionare e comporare sos produtos chi lompent dae sos istagnos de Crabas etotu e chi sunt sa base de sa gastronomia tìpica de su logu.

Comente onni festival chi si respetet, finas cussu dedicadu a sa butàriga de lissa at in programma momentos dedicados a sa mùsica e unos cantos ispetàculos chi ant a acumpangiare sos bisitadores chi ant a lòmpere in sa bidda in provìntzia de Aristanis pro mandigare s'oru de Crabas. No est totu, pro ite su programma est ricu puru de àteros atopos: cunvegnos e finas laboratòrios.

Una cosa de interessu e chi tocat a sutalineare est ca sas barracas in ue s'ant a pòdere tastare sos màndigos ant a ofèrrere peri unu libreddu in ue s'ant a pòdere lèghere sas retzetas de sa coghina de mare in ue sos crabarissos impreant sa bòtàriga. “Ma - faghent ischire sos organizadores - sa botàriga no andat totu bene, tocat a impreare cussa fata comente si depet, cussa fata sighende onni fasa de sa produtzione sua”.

Su Festival dedicadu a sa botàriga torrat a pustis de duos annos. Custa rassigna gastronòmica, difatis, fiat istada firmada dae sas restritziones cajonadas dae s'impestadura de su covid-19. Sas tres dies de festa s'ant a isboligare in su tzentru istòricu de sa bidda.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22